Украинада урушнинг янги даври бошланди, Харьков учун жангда Украина ғолиб бўлгани маълум қилинди

Украина урушнинг янги босқичига кирмоқда, бу ҳақда мамлакат мудофаа вазири Алексей Ресников маълум қилди, деб ёзади Meduza.

«Россия стратегик мағлубиятга учради — у 9 майгача ҳарбий аралашув ва ҳокимиятни Россия қўғирчоқлари қўлига олиб бериш йўли билан Украина давлатини йўқ қила олмади. Биз уни нишонлар кўламини тезкор-тактик даражагача пасайтиришга мажбур қилдик. Шундай бир вазиятда биз урушнинг янги, узоқ давом этувчи даврига киряпмиз. Унда ғолиб бўлиш учун ресурсларни пухталик билан режалаштириш, хатоларга йўл қўймаслик ва ўз кучимизни шундай лойиҳалаштиришимиз керакки, душман охир-оқибат дош бера олмасин», — деб ёзди у Facebook’да.

Резников Украина мудофаа салоҳиятини оширишга ҳамда бир миллион кишини қурол-яроғ билан таъминлашга ваъда берди. Унинг сўзларига кўра, ҳозирги пайтда бир ярим минг украин ҳарбийлари ўқитилмоқда, улар Ғарб мамлакатларидан ёрдам сифатида Украинага етказиб берилаётган техникани ишлатиш бўйича инструкторлар бўлиб етишиб чиқади.

Мудофаа вазири Украинани олдинда ўта оғир ҳафталар кутаётгани ҳақида огоҳлантирди, аммо жанговар ҳаракатларда ўзгаришлар бўлишига умид билдирди.

«Россияга нисбатан санкциялар босимининг ошиб бориши ва Украинага чет элдан ёрдамнинг кўпайиши бир неча ойлик истиқболда шундай шароитларни юзага келтириши керакки, Кремль қандайдир муваффақиятга эришиш имкониятидан бутунлай маҳрум бўлади. Шунда Украина учун янги имкониятлар эшиги пайдо бўлиши керак», — деб ёзди у.

Айни пайтда Американинг уруш тадқиқотлари институти ҳисобот эълон қилиб, россиялик ҳарбийлар Харьков атрофидаги ўз позицияларини батамом тарк этишга қарор қилганини маълум қилди.

Таҳлилчилар қайд этишича, Харьков остоналаридаги Россия бўлинмалари сўнгги кунларда Украина кучлари контрҳужумлари фонида ўз позицияларини сақлаб қолишга уринмаган — Москва шаҳар яқинидаги позицияларини ушлаб қолишдан кўра, ўз бўлинмаларини тартиб билан олиб кетишни афзал кўрган.

Шу тариқа, деб ёзади экспертлар, Украина россияликларнинг шаҳарни қуршовга олишига ҳам, эгаллаб олишига ҳам имкон бермасдан, афтидан, Харьков учун жангда ғолиб бўлган — таҳлилчилар россиялик ҳарбийларнинг ушбу чекинишини уларнинг март охирида Киев остоналарини тарк этишига қиёслади.

Уруш тадқиқотлари институти қайд этишича, Россия қўшинларининг асосий саъй-ҳаракатлари ҳозир худди аввалгидек Северодонецк ва Лисичанскни шимолдан ва жанубдан ўраб олишга қаратилган.

Харьков Россия билан чегарадан 25 км узоқликда жойлашган. Россия қўшинлари урушнинг биринчи куниёқ шаҳарга яқинлашган, аммо уни ўз назорати остига ололмаган.