Birlashgan Arab Amirliklari Oliy federal kengashi 14-may, shanba kuni Abu-Dabi valiahd shahzodasi, marhum prezident Xalifa ibn Zayd Ol-Nahayonning ukasi shayx Muhammad ibn Zayd Ol-Nahayonni mamlakatning yangi prezidenti etib sayladi. Bu haqda WAM milliy axborot agentligi xabar berdi.
Ta’kidlanishicha, kengash bir ovozdan Abu-Dabi valiahd shahzodasini Birlashgan Arab Amirliklari prezidenti deb saylagan. Kengash majlisiga vaqtinchalik davlat rahbari vazifasini bajarayotgan vitse-prezident va bosh vazir, Dubay amirligi hukmdori shayx Muhammad ibn Rashid al-Maktum rahbarlik qilgan.
Eslatib o‘tamiz, Birlashgan Arab Amirliklari prezidenti va Abu-Dabi amiri Xalifa ibn Zayd Ol-Nahayon 13-may kuni uzoq davom etgan kasallikdan so‘ng 73 yoshida vafot etdi.
So‘nggi yillarda BAA prezidenti davlat ishlari bilan deyarli shug‘ullanmasdi, mamlakatni boshqarishni poytaxt amirligi Abu-Dabi valiahd shahzodasi Muhammad ibn Zaydga topshirib qo‘ygandi.
Marhum Xalifa ibn Zayd Ol-Nahayon BAA asoschisi Zayd Ol-Nahayonning to‘ng‘ich o‘g‘li bo‘lgan bo‘lsa, shayx Muhammad ibn Zayd Ol-Nahayon uning uchinchi o‘g‘lidir.
Izoh (0)