Шимолий Кореяда номаълум безгак авж олди. Бу ҳақда Жанубий Кореянинг Yonhap агентлиги КХДР Марказий телеграф агентлигига таяниб хабар берган.
Агентлик маълумотларига кўра, 350 минг киши ушбу безгакка чалинган, уларнинг 162 минг нафари даволаниб бўлган. Ушбу касаллик коронавирус билан боғлиқ ёки йўқлигига аниқлик киритилмаган.
12 май куни Шимолий Корея ҳудудида 18 минг киши «келиб чиқиши номаълум бўлган безгак»ка чалинган. Таъкидланишича, ушбу касаллик мамлакатда апрель охирида тарқалишни бошлаган.
«Безгакнинг пойтахт ҳудудида тарқалиши шуни кўрсатадики, яратилган ҳимоя тизимининг заиф нуқталари бор», — дейилади хабарда.
Эслатиб ўтамиз КХДРдаги COVID-19 га чалиниш билан боғлиқ илк ҳолат ҳақида 12 май куни маълум бўлди. 8 май куни Пхеньяндаги беморлардан тест олинган, натижалар омикрон штамми билан касалланиш ҳолатини кўрсатган.
Шундан сўнг республика ҳукумати «максимал фавқулодда вазият» учун вирусни назорат қилиш тизими жорий этилишини эълон қилди. Кейин Шимолий Корея етакчиси Ким Чен Ин Сиёсий бюро йиғилишини ўтказиб, вирус тарқалишининг олдини олиш учун барча чораларни кўришга ва чегара назоратини кучайтиришга чақирди.
Жанубий Корея президенти маъмурияти Шимолий Корея ҳукуматига COVID-19 га қарши курашда гуманитар ёрдам кўрсатишга тайёрлигини маълум қилди.
Пандемия бошланганидан бери Пхеньян бирор марта мамлакатда коронавирусга чалиниш ҳолатлари ҳақида расман хабар бермаган. Бироқ 2020 йил июль ойида Марказий телеграф агентлиги мамлакатда COVID-19 борлиги тахмин қилинаётгани ҳақида хабар берди. Агентлик маълумотларига кўра, вирусни юқтирганлар КХДР чегарасини «ноқонуний равишда кесиб ўтган» бўлиши мумкин. Шундан сўнг Ким Чен Ин ҳукмрон Ишчилар партияси Сиёсий бюросининг фавқулодда йиғилишини чақирган. Касалланган одам билан алоқада бўлганларнинг барчаси карантинга олинган.
Вирус кириб келишининг олдини олиш мақсадида 2020 йил январь ойида Шимолий Корея ҳукумати хорижликлар ва ўз фуқаролари учун қуруқлик, денгиз ва ҳаво чегараларини ёпди, шунингдек, мамлакат ичида ҳаракатланишга қаттиқ чекловлар киритди. Ўша йилнинг февраль ойидан қатор давлатларнинг элчихоналари ёпила бошлади, дипломатлар мамлакатни тарк этди. Бундан ташқари, дунёда COVID-19 билан боғлиқ вазият туфайли КХДР 2021 йилда Токиода бўлиб ўтган Ёзги Олимпия ўйинларида иштирок этишдан бош тортди.
Мавзуга доир:
Изоҳ (0)