Шри-Ланкадаги энг нуфузли сиёсатчи ва собиқ бош вазир Маҳинда Ражапакса норозилик намойишлари сабаб ҳарбий базага қочиб кетди

Шри-Ланканинг собиқ бош вазири Маҳинда Ражапакса мамлакатдаги норозилик намойишлари фонида ҳарбий-денгиз базасига қочиб кетди, деб ёзмоқда Reuters.

Амалдаги президент Готабая Ражапаксанинг акаси ва Шри-Ланканинг икки карра собиқ президенти Маҳинда Ражапакса ўз хавфсизлиги учун шимоли-шарқдаги Тринкомали ҳарбий-денгиз базасида яширинганини ҳарбийлар тасдиқлади.

Шри-Ланкадаги норозилик намойишлари фонида Маҳинда Ражапакса сал аввал истеъфога чиққан эди. Хабар қилинишича, шундан кейин ҳам намойишчилар собиқ бош вазирнинг пойтахт Коломбодаги қароргоҳини ўраб олган, шундан сўнг у оиласи билан ҳарбий базага қочиб кетган.

Юзлаб одамлар Ражапаксанинг вилласини қўриқлаётган полициячилар гуруҳига ҳужум қилиб, вандализм ҳаракатини амалга оширган. Оломон вилладан кейин Готабая ва Маҳинданинг марҳум отасига бағишлаб очилган музейга борган, у ердаги экспонатларни бузиб ташлаган ва бино ичини ёқиб юборган.

Кейинчалик, мамлакат бўйлаб комендантлик соати жорий қилинганига қарамай, одамлар ҳарбий денгиз базаси олдида ҳам тўплангани хабар қилинди.

«Биз комендантлик соатига қарамай намойиш ўтказиладиган жойга келдик. Биз ҳозир азият чекяпмиз. Керосин, бензин, дизель ёнилғиси, электр — ҳеч бири йўқ», — дейди намойишчилардан бири.

Reuters агентлигининг қайд этишича, 76 ёшли Маҳинда Ражапакса мамлакатдаги энг нуфузли сиёсатчи ҳисобланади, узоқ давом этган фуқаролар урушини тугатгани учун кўплаб шри-ланкаликлар уни яхши кўради. Бироқ 1948 йилда Шри-Ланка мустақилликка эришганидан бери энг оғир молиявий инқироз Ражапакса оиласининг келажагини шубҳа остига қўйди.

2005 йилда Маҳинда Ражапакса президентлик сайловларида ғалаба қозонган ва ўша пайтда Мудофаа вазири бўлиб ишлаётган Готабая иккиси мамлакат шимоли ва шарқидаги айирмачилар билан фуқаролар урушини тугатган. Маҳинда 2015 йилда учинчи президентлик муддатидан бош тортди, бироқ унинг укаси Готабая 2019 йилги президентлик сайловларида ғалаба қозонди.

Эслатиб ўтамиз, Шри-Ланкада мамлакатдаги оғир иқтисодий инқироз туфайли бош вазир ва президентнинг истеъфосини талаб қилиб, бир неча ҳафта давом этган тинч намойишлар ҳалокатли тартибсизликларга айланиб кетди.

Айни пайтда Шри-Ланка президенти Готабая Ражапакса норозиликларга қарамай, ўз лавозимини тарк этишдан бош тортди. Бироқ кейинроқ у янги бош вазирни тайинлашга, шунингдек, парламент функцияларини кенгайтиришга, ўз ваколатларининг бир қисмидан воз кечишга, норозилик ҳукм сураётган мамлакатдаги вазиятни барқарорлаштиришга ваъда берди.