Президент Шавкат Мирзиёев 12 май куни Фарғона вилоятига ташрифи чоғида Фурқат тумани, «Қўқонбой» маҳалласидаги «Уста Юсуфжон наққош» оилавий корхонасига ташриф буюрди. Бу ҳақда «Дарё» мухбири хабар бермоқда.
Маълум қилинишича, мазкур корхонанинг майдони 0,7 гектар, қиймати 7,2 миллиард сўмни ташкил қилади. Бу ерда миллий ҳунармандчилик йўналишида ёғоч ўймакорлиги мактаби ҳам ташкил этилган.
Давлат раҳбари корхонани кўздан кечириб, ҳунармандчилик соҳасининг тарихи ва бугунги кундаги аҳамияти ҳақида гапирган.
Оилавий корхонада йилига 5,9 миллиард сўмлик миллий ҳунармандчилик йўналишидаги ёғоч ўймакорлиги ҳамда ёғочдан тайёрланган уй рўзғор буюмлари ишлаб чиқарилади. Оилавий корхона томонидан асосан Қўқон ёғоч ўймакорлиги мактаби услубида анъанавий айвонсозлик маҳсулоти ишлаб чиқарилади ҳамда ўрнатиб берилади. Ишлаб чиқарилган маҳсулотлар ички бозорда сотилади.
Уста ўз ижодида асосан «паргори» нақшининг 30 дан ортиқ туридан фойдаланиб келади, у безаган кўп қиррали курси, лавҳ, қутичалар ўз жозибадорлиги билан ажралиб туради.
Корхонада 100 та иш ўрни яратилиб, уларнинг 60 фоизига ишсиз ёшлар ва эҳтиёжманд оилалар аъзолари ишга жойлаштирилади.
Аввалроқ Шавкат Мирзиёев Фарғона вилоятига ташрифини Олтиариқ туманидан бошлагани тўғрисида хабар берилганди. Президент Олтиариқ тумани чеккасида минг гектар адирликда ташкил этилган узумчилик ва боғдорчилик плантациясини бориб кўрган.
Изоҳ (0)