Prezident Shavkat Mirziyoyev 12-may kuni Farg‘ona viloyatiga tashrifi chog‘ida Furqat tumani, “Qo‘qonboy” mahallasidagi “Usta Yusufjon naqqosh” oilaviy korxonasiga tashrif buyurdi. Bu haqda “Daryo” muxbiri xabar bermoqda.
Ma’lum qilinishicha, mazkur korxonaning maydoni 0,7 gektar, qiymati 7,2 milliard so‘mni tashkil qiladi. Bu yerda milliy hunarmandchilik yo‘nalishida yog‘och o‘ymakorligi maktabi ham tashkil etilgan.
Davlat rahbari korxonani ko‘zdan kechirib, hunarmandchilik sohasining tarixi va bugungi kundagi ahamiyati haqida gapirgan.
Oilaviy korxonada yiliga 5,9 milliard so‘mlik milliy hunarmandchilik yo‘nalishidagi yog‘och o‘ymakorligi hamda yog‘ochdan tayyorlangan uy ro‘zg‘or buyumlari ishlab chiqariladi. Oilaviy korxona tomonidan asosan Qo‘qon yog‘och o‘ymakorligi maktabi uslubida an’anaviy ayvonsozlik mahsuloti ishlab chiqariladi hamda o‘rnatib beriladi. Ishlab chiqarilgan mahsulotlar ichki bozorda sotiladi.
Usta o‘z ijodida asosan “pargori” naqshining 30 dan ortiq turidan foydalanib keladi, u bezagan ko‘p qirrali kursi, lavh, qutichalar o‘z jozibadorligi bilan ajralib turadi.
Korxonada 100 ta ish o‘rni yaratilib, ularning 60 foiziga ishsiz yoshlar va ehtiyojmand oilalar a’zolari ishga joylashtiriladi.
Avvalroq Shavkat Mirziyoyev Farg‘ona viloyatiga tashrifini Oltiariq tumanidan boshlagani to‘g‘risida xabar berilgandi. Prezident Oltiariq tumani chekkasida ming gektar adirlikda tashkil etilgan uzumchilik va bog‘dorchilik plantatsiyasini borib ko‘rgan.
Izoh (0)