Central Asia Barometer (CAB) Роза Люксембург фонди билан ҳамкорликда «Бирлашган Марказий Осиё. Тўсиқлар, имкониятлар, истиқболлар» тадқиқот лойиҳасини ўтказди. 2021 йилда лойиҳанинг биринчи фазасини ўтказиш учун икки мамлакат — Ўзбекистон ва Қозоғистон танлаб олинган. Бу ҳақда CАB «Дарё»га маълум қилди.
Сўровнинг асосий мавзуси Ўзбекистон ва Қозоғистон фуқаролари Марказий Осиёдаги қўшни давлатлар ҳақида қанчалик маълумотга эга ва қандай муносабатда экани, мамлакатлар ўртасидаги ўзаро алоқани қанчалик юқори баҳолаши ва янада қалин кооперация истиқболларига қандай қарашлари ҳақидаги саволларни ўз ичига олган.
Сўров натижаларига кўра, қозоғистонликларнинг катта қисми Қирғизистон ва Ўзбекистонни энг яқин дўстона давлат деган бўлса, ўзбекистонликларнинг тахминан тенг улуши Қозоғистонни бир вақтнинг ўзида энг яқин ва у қадар яқин бўлмаган дўстона мамлакат деб ҳисоблаган, Тожикистон ва Туркманистон ҳам у қадар яқин бўлмаган деб ҳисобланган.
Ўзбекистонликлар Марказий Осиё давлатлари иттифоқини яратиш ғоясига анча мойиллик билдирган (64 фоиз) бўлса, қозоғистонликлар бу борада анча эҳтиёткор (43 фоиз). Қозоғистон фуқаролари ўзбекистонликлар билан таққосланганда Марказий Осиёдаги вазиятдан анча яхши хабардор — мос равишда 71 фоизга 55 фоиз.
Қозоғистонликлар Макразий Осиё давлатларининг иқтисодий ҳолатини анча пессимистик баҳолаган бир пайтда, Ўзбекистон фуқаролари анча ижобий нуқтаи назарга эга — 25 фоизга қарши 62 фоиз.
Таъкидланишича, сўровлар 2021 йилнинг 19 августидан 8 сентябрига қадар ўтказилган бўлиб, унда Қозоғистондан 800 киши, Ўзбекистондан эса 802 киши қатнашган.
Изоҳ (0)