Central Asia Barometer (CAB) Roza Lyuksemburg fondi bilan hamkorlikda “Birlashgan Markaziy Osiyo. To‘siqlar, imkoniyatlar, istiqbollar” tadqiqot loyihasini o‘tkazdi. 2021-yilda loyihaning birinchi fazasini o‘tkazish uchun ikki mamlakat — O‘zbekiston va Qozog‘iston tanlab olingan. Bu haqda CAB “Daryo”ga ma’lum qildi.
So‘rovning asosiy mavzusi O‘zbekiston va Qozog‘iston fuqarolari Markaziy Osiyodagi qo‘shni davlatlar haqida qanchalik ma’lumotga ega va qanday munosabatda ekani, mamlakatlar o‘rtasidagi o‘zaro aloqani qanchalik yuqori baholashi va yanada qalin kooperatsiya istiqbollariga qanday qarashlari haqidagi savollarni o‘z ichiga olgan.
So‘rov natijalariga ko‘ra, qozog‘istonliklarning katta qismi Qirg‘iziston va O‘zbekistonni eng yaqin do‘stona davlat degan bo‘lsa, o‘zbekistonliklarning taxminan teng ulushi Qozog‘istonni bir vaqtning o‘zida eng yaqin va u qadar yaqin bo‘lmagan do‘stona mamlakat deb hisoblagan, Tojikiston va Turkmaniston ham u qadar yaqin bo‘lmagan deb hisoblangan.
O‘zbekistonliklar Markaziy Osiyo davlatlari ittifoqini yaratish g‘oyasiga ancha moyillik bildirgan (64 foiz) bo‘lsa, qozog‘istonliklar bu borada ancha ehtiyotkor (43 foiz). Qozog‘iston fuqarolari o‘zbekistonliklar bilan taqqoslanganda Markaziy Osiyodagi vaziyatdan ancha yaxshi xabardor — mos ravishda 71 foizga 55 foiz.
Qozog‘istonliklar Makraziy Osiyo davlatlarining iqtisodiy holatini ancha pessimistik baholagan bir paytda, O‘zbekiston fuqarolari ancha ijobiy nuqtayi nazarga ega — 25 foizga qarshi 62 foiz.
Ta’kidlanishicha, so‘rovlar 2021-yilning 19-avgustidan 8-sentabriga qadar o‘tkazilgan bo‘lib, unda Qozog‘istondan 800 kishi, O‘zbekistondan esa 802 kishi qatnashgan.
Izoh (0)