Намангандаги халқаро гуллар фестивалига 1,5 млн меҳмон келиши кутилмоқда. Фестиваль икки ҳафта давом этади (фото ва видео)

Наманганда олтмиш биринчи бор ўтказиладиган халқаро гуллар фестивалига 1,5 миллиондан ортиқ меҳмон келиши кутилмоқда. Бу ҳақда Наманган вилояти ҳокимининг туризм ва маданий мерос масалалари бўйича ўринбосари Ботир Нуриддинов маълум қилди, дея хабар беради «Дарё» мухбири Азизбек Абдувалиев.

Нуриддиновнинг айтишича, фестиваль илк бор икки ҳафта — жорий йил 22 майдан 5 июнга қадар давом этади. Олдинлари бу муддат икки-уч кун, ўтган йили эса бир ҳафтадан иборат бўлганди.

«2021 йили фестивалга 20 давлатдан меҳмонлар келганди. Бу йил 30 дан ортиқ мамлакатдан меҳмонлар кутяпмиз. Дипломатик корпус вакиллари, Наманган билан биродарлашган вилоят ва шаҳарлар мутасаддилари, қўшма корхоналаримизнинг чет эллик раҳбарларига таклифномалар юборилган. Байрамда иштирок этадиган гулчилар географияси ҳам кенгайди: ўтган йили эронлик гулчилар кўргазмаси билан қатнашган бўлса, бу йил Польша, Жанубий Корея, Ҳиндистон, Италия ва Германия гулчилари иштирок этади», — дейди Ботир Нуриддинов.

Фестиваль бўлиб ўтадиган Наманган шаҳридаги Бобур номли боғда 10 миллион, шаҳар кўчаларида 10 миллион, жами 20 миллион гул ва кўчатлар экилмоқда.

Шунингдек, шаҳар кўчалари турфа хил инсталляциялар билан ҳам безатилмоқда.

«Дарё» мухбирининг «Келаётган меҳмонлар оқими кўпайгани яхши, бироқ уларни жойлаштириш масаласи нима бўлади?» деган саволига жавобан вилоят ҳокимининг ўринбосари қуйидагиларни билдирди:

«Ҳозирги кунда Намангандаги 25 та меҳмонхона 2,5 мингдан ортиқ меҳмонни қабул қилиш имкониятига эга. Яна 5 та меҳмонхонани тадбир арафасида очиш тараддудидамиз. Наманган шаҳри ва шаҳарга туташ туманларда жойлашган оилавий меҳмон уйларига ҳам алоҳида эътибор қаратилади».

Меҳмонларга хизмат кўрсатиш учун жами 60 кишидан иборат волонтёрлар гуруҳи шакллантирилмоқда. Хорижий тилларни пухта ўзлаштирган ёшлар шаҳарнинг мўъжаз хариталари ва буклетлар билан таъминланади.

Фестивалнинг маданий дастури ҳам бой ва қизиқарли бўлиши кутилмоқда. Бобур номли боғ, «Афсоналар водийси» парки ва Алишер Навоий номли вилоят мусиқали драма театри олдида ўрнатиладиган саҳналарда шоир ва ёзувчилар, цирк усталари, ўзбек эстрадаси юлдузлари ва фольклор ансамбллари чиқишлари намойиш этилади.

Фестиваль якунида тадбирда муносиб иштирок этган гулчилар ва корхона-ташкилотлар 12 та номинация бўйича тақдирланади. Олий ўринларни эгаллаганларга автомобиллар топширилиши кўзда тутилган.