Тошкент шаҳрида 11—12 май кунлари «Халқ дипломатияси — тараққиёт йўлида ўзаро ҳамжиҳатлик» шиори остида Шанхай ҳамкорлик ташкилотига аъзо давлатларнинг Халқ дипломатияси форуми бўлиб ўтади. Бу ҳақда Ташқи ишлар вазирлиги расмий вакили хабар қилди.
Қайд этилишича, тадбир Ўзбекистоннинг ШҲТга раислиги ташаббусида ўтказилади. Форумда ташкилотга аъзо давлатлар парламентлари, халқаро тузилмалар, нодавлат нотижорат ташкилотлари, шунингдек, илмий-таҳлил марказлари вакилларидан иборат 120 дан ортиқ иштирокчи қатнашиши кутилмоқда.
Форум аввалида иштирокчиларга табрик нутқлари билан Сенат раиси Танзила Норбоева, Бутунхитой халқ вакиллари кенгаши Доимий қўмитаси раиси ўринбосари, ШҲТнинг яхши қўшничилик, дўстлик ва ҳамкорлик бўйича Хитой қўмитаси раиси Шен Юеюе ва Ўзбекистон ташқи ишлар вазири вазифасини бажарувчи Владимир Норов сўзга чиқади.
Форум якунлари бўйича ШҲТ халқ дипломатиясининг Тошкент коммюникесини қабул қилиш режалаштирилган.
Аввалроқ Тошкентда ШҲТга аъзо давлатлар вакиллари Эроннинг ташкилотга кириш тартибини келишиб олгани, Ўзбекистон 2022 йил қандай халқаро тадбирларга мезбонлик қилиши, Тошкентда ШҲТ халқаро ярим марафони бўлиб ўтгани ҳақида хабар берилган.
Изоҳ (0)