Тошкентда 63 ёшли аёл невараси тенги йигит томонидан зўравонликка учрагани, ҳолат юзасидан жиноят иши қўзғатилгани ҳақида хабар берилганди. «Nemolchi.uz» лойиҳаси йигитга суд ҳукми ўқилганини маълум қилди.
Эслатиб ўтамиз, воқеа ҳақида 2021 йилнинг октябрида Ўзбекистонда зўравонликка қарши «Nemolchi.uz» лойиҳасида эълон қилинганди. Унда маст ҳолдаги йигит эрталаб сайрга чиққан 63 ёшли аёлни зўрлаш мақсадида кийимини йиртгани, у қаршилик қилгач, калтаклагани, бунинг оқибатида аёл соғлиғига жиддий зарар етгани айтилган.
Дастлаб Жиноят кодексининг 277-моддаси (безорилик) билан жиноят иши қўзғатилган. Аммо жабрланувчи бундан норози бўлган. Офтальмолог ва невропотолог кўригидан ўтгач аёл нафақат кўриш қобилиятига салбий таъсир қилгани, балки оғир бош оғриқлари келтириб чиқарган бош мия ёпиқ жароҳати олгани маълум бўлган. Шифокор чап кўз гипертензияси, нейропатия ташхисини қўйган.
Январь ойида Чилонзор тумани судьяси жабрланувчи адвокатининг ишни Жиноят кодексининг 277-моддасидан (безорилик) 25 ва 118-моддаси (номусга тегиш)га ўзгартириш ва соғлиғига етказилган зарарни ўртача оғирликдаги деб топиш (бунинг учун у комплекс экспертиза ўтказишни сўраган) ва жиноят ишини туман прокуратураси орқали қўшимча тергов ўтказиш учун Чилонзор тумани ИИБга юбориш тўғрисидаги илтимосномасини қаноатлантирган.
Жабрланган аёлнинг сўзларига кўра, терговчи ишни пайсалга солиб келган, охир оқибат ишни кўриб чиқиш муддати ўтиб кетган. Комплекс экспертизадан ўтишга йўлланма олиш учун адвокат ва жабрланувчининг қизи ўзлари бир неча бор терговчи олдига келган, лекин тегровчи текширувга юбормаган. Бундан ташқари, жабрланган аёл зўравонликка учраган куни йиртилган кўйлаги бўлагини сақлаб қўйган ва уни ашёвий далил сифатида ишга жалб этиб, экспертизадан ўтказишни бир неча бор терговчидан сўраган. Жабрланувчининг қизи ва унинг адвокати ҳам ашёвий далилларни қабул қилингунича ўзлари бир неча марта терговчига олиб боришларига тўғри келган.
Адвокат охирги марта борганида иш яна судга оширилгани, аммо иш қайта таснифланмагани ва етказилган зарар ҳам енгил тан жароҳатилигича қолганини билган. Бунинг ва қўшимча экспертиза ўтказилмагани сабаби ҳам жабрланувчига тушунтирилмаган.
«Ҳолат содир бўлганига қарийб саккиз ой ўтди, аёл ҳали ҳам бош оғриғидан азият чекмоқда, кўриш қобилияти кескин тушиб кетган, қолаверса, бошдан ўтказган стресс ҳам унинг соғлиғига ёмон таъсир қилди», — дейилади «Nemolchi.uz» Telegram-каналида.
Билдирилишича, судланувчи ва унинг адвокати ҳали ҳам аёлнинг ўзи йигитни биринчи ҳақорат қилиб, кейин урганликда айбламоқда. Аммо буни исботловчи ҳеч қандай далиллар келтирмаган.
21 апрель куни жиноят ишлари бўйича Чилонзор туман суди судланувчи шахс — 21 ёшли А.З.ни Жиноят кодексининг 277-моддаси (безорилик) билан айбдор деб топган. Йигит бир йилга манзил-колонияга ҳукм қилинган. Ушбу моддада узоғи беш йилгача озодликдан маҳрум қилиш жазоси белгиланган. Жабрланувчи ва унинг адвокати туман суднинг бу ҳукмидан норози бўлиб шаҳар судига кассация шикояти киритган.
Изоҳ (0)