Toshkentda 63 yoshli ayol nevarasi tengi yigit tomonidan zo‘ravonlikka uchragani, holat yuzasidan jinoyat ishi qo‘zg‘atilgani haqida xabar berilgandi. “Nemolchi.uz” loyihasi yigitga sud hukmi o‘qilganini ma’lum qildi.
Eslatib o‘tamiz, voqea haqida 2021-yilning oktabrida O‘zbekistonda zo‘ravonlikka qarshi “Nemolchi.uz” loyihasida e’lon qilingandi. Unda mast holdagi yigit ertalab sayrga chiqqan 63 yoshli ayolni zo‘rlash maqsadida kiyimini yirtgani, u qarshilik qilgach, kaltaklagani, buning oqibatida ayol sog‘lig‘iga jiddiy zarar yetgani aytilgan.
Dastlab Jinoyat kodeksining 277-moddasi (bezorilik) bilan jinoyat ishi qo‘zg‘atilgan. Ammo jabrlanuvchi bundan norozi bo‘lgan. Oftalmolog va nevropotolog ko‘rigidan o‘tgach ayol nafaqat ko‘rish qobiliyatiga salbiy ta’sir qilgani, balki og‘ir bosh og‘riqlari keltirib chiqargan bosh miya yopiq jarohati olgani ma’lum bo‘lgan. Shifokor chap ko‘z gipertenziyasi, neyropatiya tashxisini qo‘ygan.
Yanvar oyida Chilonzor tumani sudyasi jabrlanuvchi advokatining ishni Jinoyat kodeksining 277-moddasidan (bezorilik) 25 va 118-moddasi (nomusga tegish)ga o‘zgartirish va sog‘lig‘iga yetkazilgan zararni o‘rtacha og‘irlikdagi deb topish (buning uchun u kompleks ekspertiza o‘tkazishni so‘ragan) va jinoyat ishini tuman prokuraturasi orqali qo‘shimcha tergov o‘tkazish uchun Chilonzor tumani IIBga yuborish to‘g‘risidagi iltimosnomasini qanoatlantirgan.
Jabrlangan ayolning so‘zlariga ko‘ra, tergovchi ishni paysalga solib kelgan, oxir oqibat ishni ko‘rib chiqish muddati o‘tib ketgan. Kompleks ekspertizadan o‘tishga yo‘llanma olish uchun advokat va jabrlanuvchining qizi o‘zlari bir necha bor tergovchi oldiga kelgan, lekin tegrovchi tekshiruvga yubormagan. Bundan tashqari, jabrlangan ayol zo‘ravonlikka uchragan kuni yirtilgan ko‘ylagi bo‘lagini saqlab qo‘ygan va uni ashyoviy dalil sifatida ishga jalb etib, ekspertizadan o‘tkazishni bir necha bor tergovchidan so‘ragan. Jabrlanuvchining qizi va uning advokati ham ashyoviy dalillarni qabul qilingunicha o‘zlari bir necha marta tergovchiga olib borishlariga to‘g‘ri kelgan.
Advokat oxirgi marta borganida ish yana sudga oshirilgani, ammo ish qayta tasniflanmagani va yetkazilgan zarar ham yengil tan jarohatiligicha qolganini bilgan. Buning va qo‘shimcha ekspertiza o‘tkazilmagani sababi ham jabrlanuvchiga tushuntirilmagan.
“Holat sodir bo‘lganiga qariyb sakkiz oy o‘tdi, ayol hali ham bosh og‘rig‘idan aziyat chekmoqda, ko‘rish qobiliyati keskin tushib ketgan, qolaversa, boshdan o‘tkazgan stress ham uning sog‘lig‘iga yomon ta’sir qildi”, — deyiladi “Nemolchi.uz” Telegram-kanalida.
Bildirilishicha, sudlanuvchi va uning advokati hali ham ayolning o‘zi yigitni birinchi haqorat qilib, keyin urganlikda ayblamoqda. Ammo buni isbotlovchi hech qanday dalillar keltirmagan.
21-aprel kuni jinoyat ishlari bo‘yicha Chilonzor tuman sudi sudlanuvchi shaxs — 21 yoshli A.Z.ni Jinoyat kodeksining 277-moddasi (bezorilik) bilan aybdor deb topgan. Yigit bir yilga manzil-koloniyaga hukm qilingan. Ushbu moddada uzog‘i besh yilgacha ozodlikdan mahrum qilish jazosi belgilangan. Jabrlanuvchi va uning advokati tuman sudning bu hukmidan norozi bo‘lib shahar sudiga kassatsiya shikoyati kiritgan.
Izoh (0)