«Боруссия Д» ҳужумчиси Эрлинг Ҳоланд «Манчестер Сити»га ўтишга яқин турибди.
Таниқли инсайдер Фабрицио Романо хабарига кўра, 9 май куни 21 ёшли футболчи тиббий кўрикдан ўтган ва Дортмундга қайтиб кетган. Шартнома шу ҳафта расман эълон қилиниши кутилмоқда.
«Манчестер Сити» «Боруссия»сига яқин орада Эрлингнинг товон пулини фаоллаштиришини маълум қилган. Товон пули аввалроқ эълон қилинган 75 миллион евродан 60 миллион еврога қисқартирилади.
Аввалроқ Манчестер клуби 21 ёшли футболчи билан шартнома имзолагани ва норвегиялик футболчининг ҳафтасига 500 минг фунтдан ортиқ маошга эга 5 йиллик шартнома имзолаши ҳақида хабар берилганди. Эрлинг ҳафтасига 385 минг фунт маош оладиган «Манчестер Сити» ярим ҳимоячиси Кевин де Брюйнени ортда қолдириб, АПЛдаги энг кўп маош оладиган футболчига айланиши қўшимча қилинган.
Қайд этиш керак, Ҳоландни «Манчестер Сити»дан ташқари, «Реал» ва «Барселона» ҳам ўз сафига қўшиб олишни хоҳлаганди.
Ҳоланд «Боруссия» билан 2020 йил бошида шартнома имзолаган. Унинг «Зальцбург»дан трансфери немис жамоасига 20 миллион еврога тушган. Ҳоланд «арилар» сафида 88 ўйинда 85 та гол урди ва 23 та голли узатмани амалга оширди. Трансфермаркт портали ҳужумчини 150 миллион еврога баҳолаган.
Изоҳ (0)