Сербия президенти мамлакати Россия газига 100 фоиз қарам эканини ва янги келишув тайёрланаётганини маълум қилди

Сербия президенти Александр Вучич халққа мурожаатида Сербия 100 фоиз Россия газига қарам эканини ва бу қарамлик камида икки йил давом этишини айтди. Бу ҳақда «Коммерсантъ» хабар бермоқда. 

Белград «Газпром» билан янги узоқ муддатли газ шартномаси бўйича музокараларни бошлади. Жорий муддати 31 майда тугайди.

Газга келсак, биз «Газпром» билан газ сотиб олиш борасида музокараларни бошлаяпмиз. Биз 100 фоиз Россия газига қараммиз, яна камида икки йил, балки ундан ҳам кўпроқ вақт бу давом этиши мумкин. Биз май ойининг охиригача янги келишув тайёрламоқчимиз, — дейди Вучич. 

Сербиянинг «Србиягаз» давлат компанияси ва «Газпром» ўртасидаги 31 майга қадар амал қиладиган шартномада 6 миллион куб метр етказиб бериш кўзда тутилган.

3 май куни Александр Вучич Сербия Грециядан арзонлаштирилган табиий газ сотиб олишини эълон қилди. Лойиҳа Европа Иттифоқининг Россия газига қарамлигини камайтириши керак.

Аввалроқ Вучич Сербия президентлиги сайловларида ғалаба қозонгани маълум қилганди.