Чеченистон раҳбари Рамзан Қодиров 2021 йил 1 январидан 31 декабригача қилган даромадлари ва харажатлари ҳақидаги декларацияни эълон қилди. Ўтган йили у 26 миллион 538 минг рубль даромад топган ва бу 2020 йилдаги рақамлардан 14 баробар кам.
Чеченистон раҳбари ва ҳудуд ҳукуматининг расмий сайтларига жойлаштирилган даромадлар ҳақидаги декларацияга кўра Қодиров 2344,3 квадрат метр турар жойга, майдони 3668 квадрат метр ҳамда 28361 квадрат метр бўлган 2 та ер участкасига эгалик қилади. Ҳужжатда Чеченистон раҳбарининг шахсий автомобили йўқлиги қайд этилган.
Рамзан Қодировнинг рафиқаси 209,8 квадрат метрли квартира эгаси. Шунингдек, ҳужжатда Қодированинг 2021 йилда 1 миллион 522 минг рубль даромад қилгани ёзилган. Декларацияда Рамзан Қодиров, унинг рафиқаси ва 11 нафар вояга етмаган фарзанди 300 квадрат метр майдонга эга уйга эгалик қилиши кўрсатилган.
2020 йилда Чеченистон раҳбарининг даромади 381 миллион рублни, унинг рафиқаси ишлаб топган маблағ эса 1,5 миллион рублни ташкил қилган.
Апрель бошида Рамзан Қодировга генерал-лейтенант ҳарбий унвони берилган. 2019 йилда у Россия федерация қаҳрамони деб эътироф қилиниб, мамлакатнинг энг олий мукофотига лойиқ кўрилган. Шунингдек, Қодиров «Ватан олдидаги хизматлари учун» III даражали ордени, «Жасорат» ордени, «Шараф» ордени ва бошқа давлат мукофотларининг эгаси ҳисобланади.
Изоҳ (0)