Гаванада Куба парламенти рўпарасида жойлашган бинода портлаш юз берди (видео)

Гавана марказида жойлашган «Саратога» меҳмонхонасида портлаш содир бўлди. Бу ҳақда «РИА Новости» хабар тарқатган.

Портлаш оқибатида бинонинг бир қисми вайрон бўлган. CNN хабарига кўра, меҳмонхона яқинида бўлган автобус ва автомобилларга ҳам шикаст етган.

Ҳодисага нима сабаб бўлганига ҳали аниқлик киритилмаган. Тахминлардан бирига кўра чақнаш ҳодисаси цистернадан табиий газ сизиб чиқиши оқибатида юзага келган. Ҳалок бўлганлар ёки талафот кўрганлар борасида расмий ахборот берилмаган.

Меҳмонхонадаги портлаш оқибатида 4 киши ҳалок бўлган дея ёзган маҳаллий ОАВ хабарларига таяниб «ТАСС» ҳамда «РИА Новости». Шунингдек, ҳодисадан 13 киши бедарак йўқолган. Тиббиёт ходимлари портлашдан кейин икки киҳсининг ҳалок бўлгани, 19 нафар одам жароҳат олганини билдирган.

Ҳодиса жойига полиция, қутқарувчилар ва тез ёрдам машиналари етиб келган. Одамларни эвакуация қилиш ва вайроналар атрофини кўздан кечириш ишлари амалга оширилган.

«Саратога» беш юлдузли меҳмонхонаси Гавана шаҳрининг тарихий марказида, Капитолий, яъни Куба парламенти биносига яқин ерда жойлашган. Меҳмонхона 1880 йилда қурилган ва 2005 йилда қайта таъмирланган.

Аввал Исроилнинг Элад шаҳрида номаълум шахслар ўткинчиларга ҳужум қилгани, оқибатда уч киши ҳалок бўлгани ҳақида хабар берилганди.