8-aprel kuni Toshkent shahridagi majburiy davolash narkologiya shifoxonasi xodimlari majburiy tartibda yer ag‘darish ishlariga jalb qilingani to‘g‘risida xabar berilgandi. Mehnat vazirligi holat bo‘yicha o‘rganish ishlari o‘tkazilganini ma’lum qildi.
Ijtimoiy tarmoqlarda tarqalgan videoda yer ag‘darayotgani ko‘ringan tibbiyot xodimlaridan biri rahbariyati topshirig‘idan norozi bo‘lib, “bosh hamshira va katta hamshiraning yer ag‘darish ishlariga jalb qilinganini hech qayerda ko‘rmaganman”, desa, boshqasi “hudud judayam katta — sakkiz gektar, eplab bo‘lmayapti ekan, shu sabab biz ham bu ishga jalb qilinganmiz”, degan.
Holat yuzasidan Toshkent shahar Bandlik bosh boshqarmasining Davlat mehnat inspeksiyasi tomonidan o‘rganish o‘tkazilgan.
O‘rganishda shifoxona xo‘jalik ishlari mudiri tomonidan xodimlar muassasa hududida o‘z xizmat vazifalariga kirmaydigan ishlarni bajarishni talab qilingani sababli Ma’muriy javobgarlik to‘g‘risidagi kodeksining 51-moddasi (mehnatga ma’muriy tarzda majburlash) 1-qismi bilan ma’muriy javobgarlikka tortilgan.
Avvalroq Qashqadaryoda tibbiyot xodimlari shifoxona hududini tozalashga jalb qilingani, Navoiyda bog‘cha tarbiyachilari ko‘p qavatli uylarning podyezdlarini yuvishga jalb qilingani aniqlangani to‘g‘risida xabar berilgandi.
Izoh (0)