Гаити пойтахти Порт-о-Пренсдаги аҳоли камида 20 кишининг ўлимига сабаб бўлган қуролли гуруҳлар ўртасидаги тўқнашувдан сўнг уйларини тарк этди, деб ёзмоқда Reuters.
Мамлакат фуқаролик мудофааси бошқармасининг маълум қилишича, «Чен Меҳан» ва «400 Мавозо» рақиб тўдалар ўртасида шиддатли жанглар бўлиб ўтган. Қуролланган одамлар Гаити Қишлоқ хўжалиги вазирлиги яқинидаги Ла-Плаине деб номланувчи туманда ҳам пайдо бўлган.
Reuters маълумотларига кўра, шаҳардаги отишмалар туфайли транспорт ва таълим марказлари ишлашдан тўхтаган. Бундан ташқари, қуролли тўқнашувлар ушбу ҳудудларнинг минглаб аҳолисини яшаш жойларини тарк этишга мажбур қилди.
Гаити бош вазири Aриел Анри қуролли тўдалар ўртасидаги қарама-қаршилик туфайли мамлакат бошдан кечираётган хавфли вазиятга ҳеч қандай изоҳ бермади.
Порт-о-Пренсдаги отишмалар бир неча кун олдин бошланган, бироқ аввалроқ пойтахтдан 11 километр шимоли-ғарбда жойлашган Круа-де-Букет ҳудудида ҳам отишмалар бўлиб ўтган, у ерда Карфур-Друяр, Винсент, Чад ва Лисона ҳудудларидаги қуролли тўдалар ўртасида тўқнашувлар кечмоқда.
Dominican Today хабарига кўра, жиноий гуруҳ аъзолари Доминикан элчихонаси маслаҳатчиси Карлос Гилен Татисни ҳам ўғирлаб кетишган. Дипломатнинг қариндошлари унинг таътил муносабати билан Химани шаҳрига кетганини, бироқ уйига қайтмаганини тасдиқлади.
Дипломат 500 минг доллар тўлов эвазига ушлаб турилган. Қайд этилишича, одам ўғирлашда ўтган йили америкалик ва канадалик 17 нафар миссионерни ушлаб турган жиноий гуруҳ аъзолари иштирок этган бўлиши мумкин.
Гаити полицияси мамлакатни ваҳимага солаётган ва Гаити шаҳарлари бўйлаб назорат ўрнатиб олган қуролли тўдаларга дош бера олмаяпти. Президент Жовенел Моиз ўлдирилганидан кейин қуролли норозилик намойишлари авж олди ва мамлакатнинг кўп қисми ҳукумат қўлидан чиқиб кетди.
Изоҳ (0)