Маданий мерос агентлиги Мирзачорбоғ саройи ҳали ҳам қаровсиз қолаётганига муносабат билдирди

Ижтимоий тармоқларда Кармана туманидаги Мирзачорбоғ саройи маданий мерос объектлари рўйхатига киритилган бўлса-да, шу пайтга қадар қаровсиз қолиб келаётгани ҳақида хабарлар тарқалди. Маданий мерос агентлигининг маълум қилишича, Навоий вилояти Маданий мерос бошқармаси жойига чиқиб ўрганиш ишлари олиб борган.

«Мирзачорбоғ» қароргоҳи Кармана тумани «Кўҳнақўрғон» МФЙ ҳудудида жойлашган. Маскан Бухоро амири Абдулаҳадхон томонидан 1900–1905 йилларда барпо этилган. Маданий мерос объекти таъмирталаб аҳволга келиб қолган, шу сабабли ҳам Маданият вазирлиги томонидан 2020 йилда маданий мерос объектларни таъмирлаш-тиклаш дастурига киритилган эди. 2021 йилнинг августида Туризм ва спорт бош бошқармаси ушбу объект реставрация учун бюджетдан 3,1 миллиард сўм ажратилганини маълум қилганди.

Маълумотларга кўра, сарёрнинг боғ қисми тадбиркорларга сотилган, майдони анча қисқартирилган. Ҳатто бир тадбиркор саройни бузиб, ўрнига хусусий боғча ҳам очмоқчи бўлган.

Агентликнинг маълум қилинишича, мутахассислар томонидан ҳозирги кунда Кармана тумани «Кўҳна Қўрғон» МФЙ ҳудудида XIX асрда бунёд этилган ушбу объектни муҳофаза қилиш лойиҳалари устида иш олиб борилмоқда. Амалга ошириладиган ишлар белгилаб олинган, жумладан, объектнинг ғиштли пойдевори қисмларини реставрация қилиш, таг синчининг ва горизонтал синчларни бузилган қисмларини тузатиш, том қисмидаги шиферларни олиб ташлаш, объектни тўлиқ ўраб олиш (профнастил билан).

Маълумот учун, давлат мулки ҳисобланадиган маданий мерос объектларини таъмирлаш, реставрация қилиш ишлари Вазирлар Маҳкамасининг 2019 йил 20 декабрдаги «Моддий маданий мероснинг кўчмас мулк объектларини асрашга доир фаолиятни лисензиялаш тўғрисидаги низомни тасдиқлаш ҳақида»ги 1021-сонли қарор асосида маданий мерос объектларини таъмирлаш ишларига рухсат берувчи лисензияга эга бўлган ташкилотлар томонидан амалга оширилиш мумкин.

Аввалроқ Самарқандда харобага айланган «Баҳодир Ялангтўшбий» масжиди янгидан қурилиши, Бухорода археологик ёдгорлик ҳудуди яйлов учун бериб юборилгани, Хоразмда меъморий архитектура ёдгорлиги ҳисобланувчи Дешон қалъанинг бир қисми қулаб тушгани тўғрисида хабар берилганди.