Ijtimoiy tarmoqlarda Karmana tumanidagi Mirzachorbog‘ saroyi madaniy meros obyektlari ro‘yxatiga kiritilgan bo‘lsa-da, shu paytga qadar qarovsiz qolib kelayotgani haqida xabarlar tarqaldi. Madaniy meros agentligining ma’lum qilishicha, Navoiy viloyati Madaniy meros boshqarmasi joyiga chiqib o‘rganish ishlari olib borgan.
“Mirzachorbog‘” qarorgohi Karmana tumani “Ko‘hnaqo‘rg‘on” MFY hududida joylashgan. Maskan Buxoro amiri Abdulahadxon tomonidan 1900–1905-yillarda barpo etilgan. Madaniy meros obyekti ta’mirtalab ahvolga kelib qolgan, shu sababli ham Madaniyat vazirligi tomonidan 2020-yilda madaniy meros obyektlarni ta’mirlash-tiklash dasturiga kiritilgan edi. 2021-yilning avgustida Turizm va sport bosh boshqarmasi ushbu obyekt restavratsiya uchun budjetdan 3,1 milliard so‘m ajratilganini ma’lum qilgandi.
Ma’lumotlarga ko‘ra, saryorning bog‘ qismi tadbirkorlarga sotilgan, maydoni ancha qisqartirilgan. Hatto bir tadbirkor saroyni buzib, o‘rniga xususiy bog‘cha ham ochmoqchi bo‘lgan.
Agentlikning ma’lum qilinishicha, mutaxassislar tomonidan hozirgi kunda Karmana tumani “Ko‘hna Qo‘rg‘on” MFY hududida XIX asrda bunyod etilgan ushbu obyektni muhofaza qilish loyihalari ustida ish olib borilmoqda. Amalga oshiriladigan ishlar belgilab olingan, jumladan, obyektning g‘ishtli poydevori qismlarini restavratsiya qilish, tag sinchining va gorizontal sinchlarni buzilgan qismlarini tuzatish, tom qismidagi shiferlarni olib tashlash, obyektni to‘liq o‘rab olish (profnastil bilan).
Ma’lumot uchun, davlat mulki hisoblanadigan madaniy meros obyektlarini ta’mirlash, restavratsiya qilish ishlari Vazirlar Mahkamasining 2019-yil 20-dekabrdagi “Moddiy madaniy merosning ko‘chmas mulk obyektlarini asrashga doir faoliyatni lisenziyalash to‘g‘risidagi nizomni tasdiqlash haqida”gi 1021-sonli qaror asosida madaniy meros obyektlarini ta’mirlash ishlariga ruxsat beruvchi lisenziyaga ega bo‘lgan tashkilotlar tomonidan amalga oshirilish mumkin.
Avvalroq Samarqandda xarobaga aylangan “Bahodir Yalangto‘shbiy” masjidi yangidan qurilishi, Buxoroda arxeologik yodgorlik hududi yaylov uchun berib yuborilgani, Xorazmda me’moriy arxitektura yodgorligi hisoblanuvchi Deshon qal’aning bir qismi qulab tushgani to‘g‘risida xabar berilgandi.
Izoh (0)