Ўзбекистон Ташқи ишлар вазирлиги Афғонистон билан чегарада отишма содир бўлгани ва бунинг оқибатида ҳарбий хизматчилар ҳалок бўлгани тўғрисидаги хабарларни рад этди.
Маълум қилинишича, айрим ижтимоий тармоқларда Афғонистон манбаларига таяниб, гўёки 2022 йил 4 майга ўтар кечаси Ўзбекистон—Афғонистон чегарасида отишма содир бўлгани, унинг оқибатида Ўзбекистон Давлат хавфсизлик хизмати Чегара қўшинлари ҳарбий хизматчилари ҳалок бўлгани ҳақида хабарлар тарқалмоқда.
«Шуни маълум қиламизки, тарқатилган хабарлар умуман ҳақиқатга тўғри келмайди. Чегарада вазият осойишталигича қолмоқда, жанубий сарҳадларни қўриқлаш одатдаги тартибда олиб борилмоқда. Афғонистон муваққат ҳукумати расмий вакили Забиҳулла Мужоҳид ҳам турли интернет нашрларида пайдо бўлган мақолаларни ёлғон ва асоссиз деб атади», — дейилади баёнотда.
Ташқи ишлар вазирлиги оммавий ахборот воситаларидан журналист этикасига қатъий риоя қилишга, ўз манбаларида нотўғри ва текширилмаган маълумотларни жойлаштиришдан сақланишга чақиради.
Аввалроқ Мудофаа вазирлиги Ўзбекистон ҳарбий дронлари Афғонистон ҳаво ҳудудини бузиб ўтгани ҳақидаги хабарларни рад этганди.
Изоҳ (0)