Қашқадарё вилоятининг Қамаши тумани ҳокими Ботир Тоғаевнинг хизмат автомобили рухсатсиз тонировка ва «мигалка» учун жарима майдонига жойлаштирилди. Бу ҳақда вилоят ИИБ ахборот хизмати хабар берди.
Блогер Мақсуд Музаффаровнинг «Дарё»га маълум қилишича, у давлат рақами 70 021 DAV бўлган қора рангли Gentra автомобили ялтировчи маёқ ва тонировкада ҳаракатланганини хабар бериб, бу ҳақда вилоят ЙҲХБ бошлиғига маълум қилган.
Блогернинг вилоят ЙҲХБ бошлиғига қилган мурожаатида шундай дейилади:«...вилоятимизда DAV белгили машиналарга қандайдир имтиёз берилганми? Имкони бўлса 70 021 DAV давлат рақам белгили автотранспорт воситасини бир текширтирсангиз. Унга ялт-ялт этувчи маёқча ва тонировка учун рухсатнома борми-йўқми бир билайлик. Ушбу автомашинанинг бу ишларини сизнинг бошқарувингиздаги ЙҲХБ текшира оладими?»
«Дарё» мухбирининг аниқлаштиришича, давлат рақами 70 021 DAV бўлган транспорт воситаси Қамаши тумани ҳокими Ботир Тоғаевга тегишли хизмат автомобили ҳисобланади.
Мазкур ҳолат вилоят ИИБ ЙҲХБ раҳбарияти эътиборини тортган.
«Видео юзасидан Қашқадарё вилояти ИИБ ЖХХ ЙҲХБ ходимлари томонидан суриштирув олиб борилиб Gentra русумли, 70 021 DAV давлат рақам белгили автотранспорт воситаси ҳайдовчиси тегишли рухсатномасиз автомашина олд қисмига кўк-қизил ёнувчи маёқчалар ўрнатганлик ҳамда автомобиль ён ойналарининг туси тегишли рухсатсиз қорайтирилгани маълум бўлди. Ҳайдовчига нисбатан Маъмурий жавобгарлик тўғрисидаги кодекснинг 291-моддаси (транспорт воситаларини ушлаб туриш ва кўрикдан ўтказиш асослари ва тартиби)га асосан жарима майдонига жойлаштирилди», — дейилади вилоят ИИБ ахборот хизмати маълумотида.
Эслатиб ўтамиз, ҳоким хизмат автомобили содир этган ҳуқуқбузарлик — транспорт воситалари ойнаси тусини ўзгартириш (қорайтириш) ва транспорт воситаларига товуш чиқарувчи, ёритувчи қурилмаларни ўрнатиш Маъмурий жавобгарлик тўғрисидаги кодекснинг 126 ва 127-моддаларида назарда тутилган ҳуқуқбузарликлар бўлиб, кодексга кўра ойна тусини ўзгартириш базавий ҳисоблаш миқдорининг 25 баравари миқдорида, транспорт воситаларига товуш чиқарувчи, ёритувчи қурилмаларни ўрнатиш эса уч бараваридан беш бараваргача жарима солинишига сабаб бўлади.
Изоҳ (0)