Москва вилоятида юз берган ёнғин оқибатида Ўзбекистон фуқаролари ҳалок бўлди, деб хабар беради Ташқи меҳнат миграцияси агентлиги.
Маълум қилинишича, Москва вилоятининг Митиши шаҳридаги кўп қаватли уйларнинг бирида 3 май куни содир бўлган ёнғин юзасидан Ташқи меҳнат миграцияси агентлигининг Москва шаҳридаги ваколатхонаси ходимлари тегишли ташкилотлар вакиллари билан тезкор алоқа ўрнатган.
Дастлабки маълумотларга кўра, ёнғин сигарета қолдиғи ўчирилмагани натижасида келиб чиққан.
Хонадон эгаси 4-қаватдан сакраб, олган жароҳати натижасида ва яна 2 нафар Ўзбекистон фуқароси лифтда ҳаво етишмаслиги оқибатида вафот этган.
«Ҳозирда ушбу ҳолат нозоратга олинган ва вафот этган юртдошларимиз Россияда расмий меҳнат фаолиятини амалга ошириб келаётгани сабабли уларнинг жасадларини Хорижда меҳнат фаолиятини амалга оширувчи шахсларни қўллаб-қувватлаш ҳамда уларнинг ҳуқуқ ва манфаатларини ҳимоя қилиш жамғармаси маблағлари ҳисобидан ватанга қайтариш чоралари кўрилмоқда», — дейилади хабарда.
Аввалроқ Москвада мигрантлар ишлаётган бино томининг қулаб тушиши оқибатида бир нафар Ўзбекистон фуқароси ҳалок бўлганди.
Изоҳ (0)