Жиззахда сел оқизиб кетган 20 ёшли фуқаро қутқарилди

Жиззахнинг тоғ ва тоғолди ҳудудларида кучли ёғингарчилик оқибатида сел оқимлари кузатилди, дея хабар бермоқда ФВВ матбуот хизмати.

Маълум қилинишича, 4 май куни Жиззах вилояти Зомин туманининг тоғли ҳудудларида кузатилган кучли ёғингарчилик оқибатида туманнинг Пишоғар, Аччи ва Шўрча қишлоқларидан ўтган сойлардан сел сувларини оқиши кузатилмоқда.

Ҳодиса оқибатида сел сувлари Жиззах–Зомин автомобиль йўли остида ўрнатилган қувурларга сиғмасдан ушбу йўлнинг 25, 26, 27-километрлари устидан тошиб, яна сой ўзани бўйлаб оқиб ўтган.

Зудлик билан воқеа жойига етиб борган ФВВ қутқарувчилари сувда оқиб келаётган «Пишоғар» ҚФЙ Қонғли қишлоғида яшовчи 20 ёшли фуқаро Э.Н.ни қутқариб олди. Ҳозирда ушбу фуқаронинг аҳволи яхши, тан жароҳати олмаган.

Сел оқими оқибатида аҳоли томорқалари, ҳовлилари ва ички кўчаларда сув тошиши ҳолатлари кузатилди.

Воқеа жойида вилоят ФВБ раҳбарияти бошчилигида қутқарувчилар тегишли хизматларнинг куч ва воситалари томонидан сел сувлари тошган кўчалар, аҳоли хонадонлари ўрганилмоқда, йўлларда хавфсизлик ЙҲХ хизмати томонидан назоратга олинган.