Самарқандга тарихий обидалар билан танишиш учун келган хорижлик сайёҳни ҳақорат қилган меҳмонхона иш бошқарувчисига жазо тайинланди, деб хабар беради Бош прокуратура.
Маълум қилинишича, Бош прокуратурага тарихий обидалари билан танишиш учун келган хорижлик сайёҳ, IТ соҳаси бўйича мутахассис B.К. мурожаат қилиб, унда Самарқанд шаҳрида жойлашган меҳмонхона иш бошқарувчиси А.У. уни ҳақорат қилиб, шаън ва қадр-қимматини камситганини кўрсатган ва қонуний чора кўришни сўраган.
Ўтказилган ўрганиш натижаси бўйича меҳмонхона иш бошқарувчиси А.У.нинг ҳаракатларида маъмурий ҳуқуқбузарлик аломатлари борлиги аниқланиб, тўпланган ҳужжатлар судга тақдим қилинган.
Суднинг 22 апрелдаги қарори билан ҳуқуқбузарлик содир этган А.У.га 10 сутка маъмурий қамоқ жазоси тайинланган.
«Мамлакат иқтисодиёти учун муҳим бўлган ҳар бир туристнинг хавфсизлиги ва ҳуқуқларини таъминлаш устувор вазифадир», — дейилади хабарда.
Аввалроқ Ўзбекистон тарихи, маданияти ва ўзбек тилининг хориж давлатларида тарғиботига 10 миллиард сўм ажратилиши мумкинлиги, Ўзбекистон ва Россия туризм соҳасидаги ҳамкорликни ривожлантиришга келишиб олгани тўғрисида хабар берилганди.
Изоҳ (0)