Ўзбекистонда аграр соҳадаги барча техникумлар Қишлоқ хўжалиги вазирлиги тизимига ўтказилади

Шавкат Мирзиёев ҳузурида 27 апрель куни ўтказилган йиғилишда аграр соҳа учун замонавий билимга эга ўрта бўғин мутахассисларини тайёрлаш масаласига алоҳида эътибор қаратилди. Бу ҳақда президент матбуот котиби хабар қилди.

Қайд этилишича, Қишлоқ хўжалиги вазирлиги аграр университет билан тизимдаги коллеж ва техникумларнинг ўзаро боғлиқлигини таъминлаши зарурлиги таъкидланган. Бугунги кунда Жиззах, Тошкент ва Фарғонада 3 та қишлоқ хўжалиги техникумини модернизация қилиш бошланган.

«Лекин қолган 31 та техникум ва коллеж, 83 та касб-ҳунар мактаби билан қачон шуғулланамиз?», — дея савол қўйган президент.

Қишлоқ хўжалиги ва олий таълим вазирларига икки ой муддатда техникумлар бўйича алоҳида дастур ишлаб чиқиш топширилган. Бунда:

• аграр соҳадаги барча техникумлар Қишлоқ хўжалиги вазирлиги тизимига ўтказилади;
• кластер ва бошқа йирик қишлоқ хўжалиги корхоналари билан ҳамкорликда техникумлардаги ўқув дастурлар, методологияси, дарсликлар ва амалиёт тизими бутунлай қайта кўриб чиқилади;
• техникумлар янги ташкил этиладиган агрохизматлар марказлари билан узвий боғланади.