Футбол бўйича Осиё Чемпионлар Лигаси гуруҳ босқичининг 6-турида «Пахтакор» «Ат-Таъвун» устидан 5:4 ҳисобида ғалаба қозонди.
Бу орқали «шерлар» Осиё Чемпионлар Лигасидаги ғалабалари сонини 50 тага етказиб олди. Қайд этиш жоиз, «Пахтакор» 49-ғалабасини ҳам «Ат-Таъвун»га қарши ўйинда қўлга киритган. Ундан сўнг кетма-кет «Ад-Дуҳайл» (2:3, 0:3) ва «Сепахон»га (1:2) қарши баҳсларда мағлубиятга учради.
«Пахтакор» ОЧЛда 50 та ғалабага эришган 4-жамоага айланди. Унга қадар фақат «Ал-Иттиҳод» (50), «Чонбук Моторс» (66) ва «Ал-Ҳилол» (74) ушбу маррани босиб ўтган.
Шунингдек, тошкентликлар мусобақадаги голлари сонини 160 тага етказди. Шу тариқа «Пахтакор» ОЧЛда урилган голлар сони бўйича 6-ўринга кўтарилди. «Ал-Иттиҳод» (178), «Ал-Айн» (180), «Ас-Садд» (181), «Ал-Ҳилол» (241) ва «Чонбук Моторс» (253) бу борада «Пахтакор»дан олдинда.
Маълумот учун, «Пахтакор» 6 очко билан D гуруҳини охирги ўринда якунлади. Славче Войнески жамоаси ўтказилган 6 ўйиннинг 4 тасида мағлубиятга учраган бўлса, 2 тасида ғалаба қозонди.
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @Daryo_Sport24’га обуна бўлинг!
Изоҳ (0)