Футбол бўйича Осиё Чемпионлар Лигаси гуруҳ босқичининг 6-турида «Пахтакор» 26 апрель, сешанба куни «Ат-Таъвун»га қарши баҳс олиб борди.
Учрашувда ҳисоб 14-дақиқада очилди: Язид Бакир қанотдан оширилган тўпни тўхтатмасдан дарвозага йўллаб, супер гол муаллифига айланди. Аббос Файзуллаев орадан 10 дақиқа ўтиб, мувозанатни тиклади. Шундан сўнг «Пахтакор» кетма-кет яна иккита гол уришнинг уддасидан чиқди. Голларга Азиз Турғунбоев ва Сардор Собирхўжаев муаллифлик қилди. Бироқ саудияликлар ҳам шундан сўнг 2 та гол уриб, ҳисобни тенглаштирди — 3:3.
78-дақиқага келиб, Миржаҳон Мираҳмадов яна «шерлар»ни олдинга олиб чиқди. 83-дақиқада хитойлик ҳакам тошкентликлар дарвозасига пенальти белгилади, 11 метрлик жарима зарбасидан Ҳассан Аламри унумли фойдаланди, ҳисоб яна тенглашди. Орадан 3 дақиқа ўтиб эса «Пахтакор» ғалаба голини уришнинг уддасидан чиқди. Ушбу вазиятда Аббос Эргашбоев бурчакдан узатилган тўпни боши билан дарвозага йўллади — 5:4.
Шу тариқа «Пахтакор» ОЧЛ гуруҳ босқичидаги сўнгги ўйинини ғалаба билан якунлади. Томонларнинг биринчи даврадаги ўйинида ҳам ўзбек клубининг қўли баланд келганди.
Маълумот учун, «Пахтакор» мусобақани 6 очко билан якунлаб, D гуруҳида охирги ўринни эгаллади. Славче Войнески жамоаси ўтказилган 6 ўйиннинг 4 тасида мағлубиятга учраган бўлса, 2 тасида ғалаба қозонди.
ОЧЛ
6-тур баҳси
26 апрель, сешанба
«Пахтакор» Ўзбекистон — «Ат-Таъвун» Саудия Арабистони 5:4
Голлар: 0:1 — 14 Язид, 1:1 — 24 Файзуллаев, 2:1 — 31 Турғунбоев, 3:1 — 33 Собирхўжаев, 3:2 — 51 Алнабит, 3:3 — 60 Алнабит, 4:3 — 78 Мираҳмадов, 4:4 — 83 Аламри, 5:4 — 86 Эргашбоев.«Пахтакор»: 35.Қувватов, 3.Алижонов, 88.Азмиддинов, 21.Ҳажиев, 34.Сайфиев, 6.Алибоев, 27.Собирхўжаев, 42.Файзуллаев, 8.Эркинов, 77.Мираҳмадов.
Захира: 33.Суюнов, 11.Рашидов, 14.Шаркич. 16.Розиев, 28.Холматов, 29.Ёқубов, 32.Асқаров, 36.Эргашбоев, 46.Жабборов, 63.Ўринбоев.
«Ат-Таъвун»: Альбакр, Кана, Тариқ Муҳаммад, Сумайҳан Алнабит, Муатаз Альбагави, Кристиан Луиндама, Ҳассан Ҳавсави, Мустафо Абделла, Ҳассан Аламри, Райан Муса, Наваф Алсубҳи.
Захира: Зулайфи, Фаҳад Рашиди, Алояйри, Наваф Суфён, Файсал Мутаири, Райан Жаҳоний, Ракан Тулайҳи, Ҳолид Мунташири, Басил Меҳавес.
Изоҳ (0)