Шанхай ҳамкорлик ташкилотининг Пекиндаги штаб-квартирасида «Янги Ўзбекистоннинг тараққиёт стратегияси» тақдимоти бўлиб ўтди.
Тадбирда иштирок этган дипломатлар, экспертлар ва тадбиркорлар хитой тилида чоп этилган «Янги Ўзбекистоннинг 2022—2026 йиллардаги тараққиёт стратегияси» китоби билан танишган. Мулоқот давомида Ўзбекистон президенти Шавкат Мирзиёев раҳбарлиги остида амалга оширилаётган кенг кўламли ислоҳотлар натижасида эришилган ютуқларга алоҳида эътибор қаратилган.
ШҲТ бош котиби Чжан Мин ўз чиқиши давомида Ўзбекистоннинг минтақада тинчлик ва барқарорликни таъминлаш йўлидаги ҳиссасини юқори баҳолаган. У президент Шавкат Мирзиёев тарихий ислоҳотларни амалга ошираётганини таъкидлаган. «Ўзбекистоннинг очиқ ва фаол ташқи сиёсати жаҳон миқёсида мамлакат обрўсининг ошишига ва халқаро, жумладан, ШҲТ доирасида ҳамкорликни фаоллаштиришга хизмат қилмоқда», — дейди у.
«Ўзбекистонга ташриф буюриб, мамлакатдаги янги ўзгаришларнинг шахсан гувоҳи бўлишни интиқлик билан кутяпман», — дейди ташкилот бош котиби.
Хитой Давлат кенгаши ҳузуридаги Европа ва Осиё ижтимоий ривожланиш институти директори Ли Юнсюаннинг қайд этишича, Ўзбекистонда 2017 йилда бошланган илоҳотлар бугунги кунда аниқ натижаларни бермоқда. Шавкат Мирзиёевнинг ислоҳотлар йўналиши халқаро ҳамжамиятда кенг эътироф этилган.
«Янги Ўзбекистон тараққиёт стратегияси Ҳаракатлар стратегиясининг мантиқий давомига айланди. Янги тараққиёт дастурида эришилган ўзгаришлар натижалари ва мамлакатнинг бунёдкорлик салоҳиятидан келиб чиқиб белгилаб берилган янада юксак мақсадлар кўзланган», — дейди у.
Хитой ижтимоий фанлар академияси қошидаги Хитой ва Россия ўртасидаги стратегик ҳамкорлик кенгаши директори ўринбосари Су Чаннинг айтишича, «сўнгги 5 йил ичида Ўзбекистонда амалга оширилган иқтисодий ислоҳотлар сабаб мамлакат Марказий Осиё энг барқарор давлатга ва минтақадаги иқтисодий драйверга айланган».
Умуман олганда, «Янги Ўзбекистоннинг тараққиёт стратегияси» тақдимоти Хитой сиёсий ва эксперт доиралари вакилларининг Ўзбекистондаги замонавий ислоҳотларни чуқурроқ англаш истагини кўрсатган. Уларнинг фикрича, Ўзбекистондаги ўзгаришлар Марказий Осиёда «барқарорлаштирувчи рол ўйнайди», айниқса, қўшни минтақаларда ва бутун дунёда кескинлик кучайиб бораётган ва олдиндан айтиб бўлмайдиган ҳолатлар фонида.
Изоҳ (0)