Қашқадарё тоғларида «Қизил китоб»га киритилган қўнғир айиқ ва унинг икки боласи аҳоли томондан суратга туширилгани ҳақида хабар берилганди. Кейинроқ топилган қўнғир айиқ болаларидан бири ўлдирилгани маълум бўлди. Давлат экология қўмитасининг маълум қилишича, ҳозирда ҳолат юзасидан суриштирув ишлари олиб борилмоқда.
Давлат экология қўмитаси инспекторлари ва туман ИИБ ходимлари билан биргаликда олиб борилган тезкор қидирув натижасида гумондор шахслар Деҳқонобод тумани «Оққишлоқ» МФЙ, «Қизилсой» қишлоғида яшовчи фуқаро К.Ш. экани аниқланган. Унинг хонадони текширилганида бир дона айиқ боласининг териси топилган.
Айиқ боласи терисини сақлаб келган фуқаронинг сўзларига кўра, у айиқ боласини ўлик ҳолда топган. Бу ҳолатга аниқлик киритиш мақсадида айиқ боласи териси экспертизадан ўтказилади.
Гумондор шахсдан тушунтириш хати олиниб, тегишли ҳужжатлар расмийлаштирилган. Ҳозирда тузилган ишчи гуруҳ томонидан суриштирув ишлари давом эттирилмоқда.
Бундан олдин Қорақалпоғистонда икки киши «Қизил китоб»га киритилган Бухоро буғусини ноқонуний овлагани, Қорақалпоғистонда «Қизил китоб»га киритилган 14 та кийик ва 5 та ёввойи қуённи отиб ўлдирган браконьерларга жиноят иши қўзғатилгани тўғрисида хабар берилганди.
Изоҳ (0)