Сирдарё ва Наманган вилоятларида деҳқончилик учун ажратилган ер майдонларини сотишга уринган шахслар қўлга олинди, деб хабар беради Бош прокуратура ҳузуридаги департамент.
Маълум қилинишича, департамент, ДХХнинг Сирдарё вилояти бошқармалари томонидан прокуратура ва ИИБ ходимлари билан ҳамкорликда тезкор тадбир ўтказилган. Тадбирда Ж.А. исмли шахс Гулистон тумани, «Ҳосилобод» СИУ ҳудудидан деҳқон хўжалиги ташкил қилиш учун ажратилган, суғориладиган 25 сотих ер майдонининг 10 сотихини 15 минг доллар эвазига фуқаро З.га танишлари ёрдамида уй-жой қуриш учун расмийлаштириб беришни ваъда қилгани аниқланган. У фуқародан 4 минг доллар олган вақтида ашёвий далиллар билан ушланган.
Шунингдек, департамент ҳамда ДХХнинг Наманган вилояти бошқармалари томонидан ўтказилган тезкор тадбирда, муқаддам фирибгарлик жинояти учун судланган Ғ.Қ. исмли шахс ўзгаларга ажратилган ерни сотишга урингани аниқланган. У Норин тумани «Ибрат» МФЙда яшовчи кам таъминланган оилаларга 10 йил муддатга вақтинча фойдаланиш учун ажратилган жами 1 гектар ер майдонини 80 миллион сўм эвазига фуқаро Қ.га маҳалла фуқаролар йиғини раиси орқали расмийлаштириб олиб беришни ваъда қилган. Олдиндан келишилган пулнинг 1 миллион сўмини олган вақтида ашёвий далиллар билан ушланган.
Мазкур ҳолатлар юзасидан Жиноят кодексининг 229-6-моддаси (суғориладиган ер участкасига ёки унинг бир қисмига бўлган ҳуқуқни сотиш ёхуд қонунга хилоф равишда бошқача тарзда ўзга шахсга бериш), 168-моддаси (фирибгарлик) ва 28, 211-моддаси (пора бериш) билан жиноят ишлари қўзғатилиб, тергов ҳаракатлари ўтказилмоқда.
Аввалроқ Самарқандда туман ҳокимининг сохта қарори билан қарийб 20 минг долларга ер сотган хўжалик раҳбари аниқлангани, Давлат кадастрлари палатаси Нуробод туман филиали мутахассислари 2 млн сўм пора билан ушлангани тўғрисида хабар берилганди.
Изоҳ (0)