AQSH davlat kotibi Entoni Blinken mamlakatning Rossiya energiya sohasiga nisbatan kelgusida yoqilg‘i narxining keskin oshib ketishiga sabab bo‘ladigan sanksiyalarni qo‘llamoqchi emasligini ma’lum qildi. Siyosatchi bu haqda AQSH kongressining xorij ishlari qo‘mitasidagi eshituvlar davomida aytib o‘tgan. Blinkenning bayonoti AQSH davlat departamentining rasmiy YouTube-kanaliga joylashtirilgan.
“Biz bunday sanksiyalar siyosati ortidan quvmasligimiz, ya’ni benzin narxi yana osmonga ko‘tarilishiga yo‘l qo‘ymasligimiz kerak”, — deya tushuntirgan Blinken.
Uning qo‘shimcha qilishicha, Rossiya energetikasi nisbatan radikal cheklovlarni qo‘llashdan voz kechish Moskvaga nisbatan sanksiyalar bosimining kamayishini anglatmaydi.
“Hozir bizning asosiy maqsadimiz nafaqat sanksiyalarni saqlab qolish, balki ularning miqyosini yanada kengaytirishdan iborat. Biz bu ishni qilishimiz zarur deb hisoblayman”, — degan AQSH davlat kotibi.
Shuningdek, Blinken dunyo hamjamiyatining Rossiyaga qarshi sanksiyalar qo‘llashdagi hamfikrligi haqida gapirgan va Ukrainaga yordam ko‘rsatish, Yevropadagi ittifoqchilarning Rossiyaga qarshi kurashda faol bo‘lishi zaruriyatiga to‘xtalgan.
Mart boshida Rossiya energiya resurslariga nisbatan qo‘llangan cheklovlardan keyin AQSHda neft mahsulotlarining chakana narxi rekord darajada o‘sgan. ABC News/Ipsos so‘rovnomasiga ko‘ra, amerikaliklarning yarmi narx-navoning oshishi tufayli moliyaviy qiyinchiliklarni boshidan o‘tkazmoqda.
Izoh (0)