Россия Давлат думаси спикери Вячеслав Володин Украинани «террорчи давлат» дея тан олиш зарурлигини маълум қилди. Шу орқали у ФХХнинг Россиянинг журналистлар Владимир Соловёв, Маргарита Симонян, Дмитрий Киселёв, Евгения Попова, Олга Скабаева ва режиссёр Тигран Кеосаянга суиқасдларнинг олдин олингани тўғрисидаги хабарларига изоҳ берган.
«Ўз халқига қарши уруш бошлаган Киев бошқа давлатларнинг тинч аҳолисига қарши терактларга ўтди. Миллатчилар мафкурасини қўллаб-қувватлаш мана нимага олиб келади», — деб ёзади Володин. «Зеленский жавоб бериши керак», — дея қўшимча қилади у.
Россия Давлат думаси раисининг фикрича, суиқасдларга тайёргарлик Россия томонидан махсус ҳарбий операция «тўғри ва ўз вақтида бошланганини» исботлайди.
Аввалроқ Федерал хавфсизлик хизмати Киевнинг топшириғига кўра телебошловчи Владимир Соловёвни ўлдиришни режалаштирган «неонацистлар гуруҳи»ни қўлга олганини маълум қилди. Қўлга олинган шахслар — National Socialism/White Power (Россияда тақиқланган террорчилик ташкилот) аъзоларидир. Уларнинг ёнидан ўқотар қуроллар ва «Молотов коктейли» каби ўт олдирувчи қурилмалар, шунингдек, гиёҳванд моддалар, сохта Украина паспортлари ва миллатчиларга хос буюмлар топилган. ФХХнинг қўшимча қилишича, гуруҳ аъзолари кўрсатма бермоқда.
Кейинроқ махсус хизмат тезкор суратга олиш жараёнидан парчани намойиш этган бўлиб, унда қўлга олинган шахслардан бири Кисилёв, Скабаева, Попова, Кеосаян ва Симонянни ўлдириш муҳокама қилинганини сўзлаб берган.
ФХХ томонидан террорчилик гуруҳи фаолияти фош этилишидан олдин президент Владимир Путин «россиялик таниқли тележурналист»га суиқасд режалаштирилганини айтганди. Украина хавфсизлик хизмати Соловёвга суиқасд уюштириш бўйича ҳеч қандай режаси бўлмаганини маълум қилган.
Изоҳ (0)