2024 йилда Индонезия жаҳон иқтисодиётидаги улуши бўйича Россияни ортда қолдиради. Бу ҳақда Халқаро валюта жамғармасининг (ХВЖ) 19 апрелда янгиланган прогнозларига кўра, «РБК» хабар берди.
ХВЖ 2024 йилга бориб Индонезия сотиб олиш қобилияти паритети бўйича Россияни дунёдаги олтита йирик иқтисодий кўрсаткичларга эга давлатлар сафидан сиқиб чиқаришини тахмин қилмоқда. Мутахассислар санкциялар туфайли Россия импорти экспортга нисбатан кўпроқ қисқаришини кутяпти.
Жамғарма прогнозига кўра, 2022 йил охирига келиб, Россия ялпи ички маҳсулотининг жаҳон ялпи ички маҳсулотидаги улуши 2021 йилдаги 3,07 фоизга нисбатан 2,72 фоизгача, 2024 йилда эса 2,52 фоизгача пасаяди.
Индонезиянинг глобал ялпи ички маҳсулотдаги улуши ўша йили 2,61 фоиз гача кўтарилади.
2021 йил охиридаги кўрсаткичларга кўра Россия ҳали ҳам Хитой, АҚШ, Ҳиндистон, Япония ва Германиядан кейин дунёда олтинчи йирик иқтисодиёт позициясини эгаллаб турибди.
Бироқ 2022—2023 йилларда Россиянинг реал ялпи ички маҳсулотининг жами 10,6 фоизга пасайиши ҳисобга олинган ХВЖ нинг жорий прогнозлари Индонезия Россияни еттинчи ўринга сиқиб чиқаришини англатади.
Олдинги прогноздан фарқ
ХВЖнинг апрель ойидаги прогноз горизонти 2027 йилда тугайди. Бунда Россиянинг жаҳон иқтисодиётидаги улуши 2,34 фоизгача камайиши мумкин.
Октябрь ойида эълон қилинган ХВЖнинг олдинги прогнози 2026 йил билан чекланган ва ўша вақтга келиб Россия ялпи ички маҳсулотининг дунёдаги улуши 2,84 фоизни ташкил қилиши тахмин қилинган. Бунга кўра, Россия дунёдаги олтинчи ўринни сақлаб қолиши керак эди.
2019 йилда, COVID-19 пандемиясидан олдин, ХВЖ Индонезия харид қобилияти паритети бўйича ЯИМ бўйича Россиядан ўтиб кетишини башорат қилган эди.
Бироқ, Россия иқтисодиётининг пандемиядан кутилганидан кўра ишончли ўтиши бу прогноз ўзини оқламаган эди. Энди санкциялар инқирози муносабати билан яна долзарб бўлиб бормоқда.
Россия иқтисодиёти учун жорий ҳисоб-китоблар
ХВЖ таъкидлашича, базавий сценарийда Россия иқтисодиёти 2022 йилда 8,5 фоизга, 2023 йилда эса яна 2,3 фоизга қисқаради. Жамғарманинг таъкидлашича, санкциялар ҳамда бир қатор штатларнинг, жумладан АҚШнинг нефть ва газ эмбаргоси Россия иқтисодиётига жиддий таъсир кўрсатади.
Россия расмийлари ҳали ялпи ички маҳсулот прогнозини расман тақдим этмаган. Аммо Ҳисоб палатаси раҳбари Алексей Кудрин 12 апрель куни Молия вазирлиги ва Иқтисодий ривожланиш вазирлигининг дастлабки ҳисоб-китобларига таяниб, 2022 йил охиригача ялпи ички маҳсулот 10 фоизга ёки ундан кўпроққа тушишини билдирди.
ХВЖнинг янгиланган прогнозига кўра, 2022 йилда Россия товарлари экспортининг ҳажми ўтган йилга нисбатан 17,2 фоизга қисқаради, аммо импортнинг ҳажми янада камаяди - 25,4 фоизга. 2023 йилда экспорт ва импортнинг ушбу ҳажмлари, тахминан, 2022 йилдаги даражада сақланиб қолади.
«Санкциялардан олдин хорижий активлар тўпланишининг муҳим қисми Россия банки захиралари орқали амалга оширилган. Аммо Марказий банк ҳозирда санкциялар остида бўлганлиги сабабли, хорижий активларнинг тўпланиши – жорий ҳисобдаги профицитнинг иккинчи томони – санкцияланмаган тузилмаларга ўтди», — дейди Халқаро Молия институти масъуллари.
Марказий банк турли ташкилотларнинг 27 иқтисодчиси ўртасида ўтказган сўрови натижаларига кўра, 2022 йилда Россиядан товар ва хизматлар экспорти 12 фоизга камайиб, 484 миллиард долларни ташкил этади.
Шу билан бирга, товарлар ва хизматлар импорти сезиларли даражада қисқаради — деярли 30 фоизга, 266 миллиард долларгача. Кейинги йилларда импорт 288-308 миллиард доллар пасайтирилган даражада сақланиб қолади.
Бироқ ушбу кўрсаткичларга кўра, таҳлилчилар томонидан тақдим этилган прогнозлар диапазони мисли кўрилмаган даражада кенглигича қолмоқда.
Аввалроқ Путин Россия иқтисодиёти барқарорлашганини маълум қилгани ҳақида хабар берилган эди.
Изоҳ (0)