«Металлоинвест» компанияси Ўзбекистондан юкларни темир йўл орқали ташиш тарифларини пасайтиришни сўраган. Бу ҳақда компания раҳбари Нозим Эфендиев хабар берди.
У тарифларни «адолатли» ва тенг бўлишга чақирди. Ўзбекистон ҳукумати бу масалани кўриб чиқишга ваъда берди.
«Металлоинвест» Тошкент металлургия комбинатидаги ишлаб чиқаришни Ўзбекистон тикланиш ва тараққиёт жамғармаси билан ҳамкорликда бошқаради.
Эфендиевнинг айтишича, Ўзбекистон «катта салоҳиятга» эга, аммо «логистик муаммолар мавжуд» — мамлакат денгиз портлардан ва «кучли савдо бозорларидан» узоқда жойлашган.
Бизда Россия, Қозоғистон ва Ўзбекистон ўртасида ҳар хил тарифлар: Россияда арзон, Қозоғистонда қиммат, Ўзбекистонда ундан ҳам қиммат. Ваҳоланки, бу экспорт транзити эмас, биз бу ерга қайта ишлаш учун яримтайёр маҳсулотни олиб келяпмиз, — деди у.
«Металлоинвест» раҳбари «Ўзбекистон темир йўллари» раҳбарлари билан учрашувда ушбу масалани муҳокама қилмоқчи.
Мен адолатли, бир хил тариф бўлишини истайман, бу россиялик ишлаб чиқарувчиларни бу ерга олиб келишга ундайди, — деб тушунтирди Нозим Эфендиев.
Ўзбекистон инвестициялар ва ташқи савдо вазири Сардор Умурзоқов мамлакат расмийлари муаммони ўрганаётганини айтди.
«Ўзбекистон темир йўллари» раҳбари, албатта, сиз билан боғланиб, ҳисобот беради, — деб ваъда берди у.
Аввалроқ Алишер Усмоновнинг бойлиги кескин камайгани ҳақида хабар берилган эди. Тадбиркор «Металлоинвест», Xiaomi ва бошқа телекоммуникация, тоғ-кон саноати ва медиакомпанияларида улушга эга.
Изоҳ (0)