Ўзбекистонда электромобиль ёнилғи жиҳатидан бензинли автомобилдан бир неча баробар афзалроқ. Бу ҳақда Ахборот ва оммавий коммуникациялар агентлигида ўтказилган матбуот анжуманида «Ўзавтосаноат» вакили Шавкатбек Алимов маълум қилди.
Бензинли автомобиллар 100 километрга, тахминан, 8-10 литр бензин сарфлайди. Энг арзон бензин олинса ҳам, тахминан, 65 000 сўм сарфланади.
Электромобиллар эса ўртача 100 км га 10-15 кВт қувват сарфлайди. Агар электр энергияси 295 сўм эканлигини ҳисобга олсак, 100 км га 4 000 сўмга яқин сарфланади, — деди Алимов.
У бу ўртача кўрсаткичлар эканлигини, бироқ электромобиллар ҳар қандай ҳолатда ҳам ёнилғи бўйича бензин автомобилдан анча фойдали эканлигини таъкидлади. Масалан, электромобилга техник хизмат кўрсатиш анча арзонроқ — фильтрларни ва мойни алмаштириш учун харажатлар йўқ.
Молиявий имтиёзлардан ташқари, электр транспорт воситалари бензинли автомобилларга қараганда атроф-муҳитга камроқ зарар етказади. Улар сонининг кўпайиши аҳоли саломатлигига ижобий таъсир кўрсатади.
Аввалроқ Ўзбекистонга уч ойда 455 та электромобиль импорт қилингани ҳақида хабар берилган эди.
Изоҳ (0)