Футбол бўйича Германия Бундеслигасининг 31-турида «Бавария» 23 апрель, шанба куни «Боруссия Д»ни қабул қилди.
Учрашув мезбон «Бавария»нинг 3:1 ҳисобидаги ғалабаси билан якунланди. Мюнхенликлар 15-дақиқада Серж Гнабри, 34-дақиқада эса Роберт Левандовски кетма-кет голлари эвазига ҳисобда олдинга чиқиб олди.
Иккинчи бўлим аввалида Эмри Жан ҳисобни қисқартирди. 83-дақиқага келиб эса Жамол Мусиала ўйинга якуний нуқтани қўйди.
Ушбу ғалабадан кейин «Бавария» муддатидан аввал Германия Бундеслигаси ғолиблигини қўлга киритди. Чемпионат тугашига 3 тур қолганда иккинчи ўринда бораётган дортмундликлар «Бавария»дан 12 очко ортда қолмоқда.
Қайд этиш керак, «Бавария» учун бу Бундеслигадаги кетма-кет 10-чемпионлик бўлди, жамоанинг умумий ғалабалари сони эса 32 тага етди. Мураббий Юлиан Нагелсманн «Бавария» билан илк марта мамлакат чемпионатида ғолиб бўлди.
Бундеслига
31-тур баҳси
23 апрель, шанба
«Бавария» — «Боруссия Д» 3:1
Голлар: 1:0 – 15 Гнабри, 2:0 – 34 Левандовски, 2:1 – 52, пенальти Жан, 3:1 – 83 Мусиала.«Бавария»: Нойер, Павар, Эрнандес, Упамекано, Дэвис, Горетцка, Гнабри (Мусиала, 63), Киммих (Зюле, 90), Мюллер (Забитцер, 82), Левандовски (Шупо-Мотинг, 90), Коман (Сане, 82).
«Боруссия Д: Ҳиц, Аканжи, Загаду, Геррейру, Жан, Брандт, Рейнер (Байно-Гиттенс, 67), Беллингҳем, Вольф (Мукоко, 88), Ройс, Ҳоланд (Пасслак, 87).
Огоҳлантиришлар: Жан (40).
Изоҳ (0)