Андижон вилояти Асака туманида 19 апрель куни йўл транспорт ҳодисаси оқибатида Россия фуқароси ҳалок бўлди. Бу ҳақда «Миллар» информацион дастурида хабар қилинди.
Қайд этилишича, ҳолат 19 апрель куни соат 23:00 атрофида Андижон вилояти Асака тумани Шўрқишлоқ ҳудудидан ўтувчи халқаро аҳамиятга эга, сунъий ёритилмаган А-373 автомобиль йўлининг 416-километрида содир бўлган. Россия фуқароси Nexia-2 автомашинасида вилоят бўйлаб юқори тезликда транзит ўтиб кетаётиб, рулда ухлаб қолган. Қарама-қарши йўналишга чиқиб кетиб, бошқа автомобиль билан тўқнашиб кетган.
ЙТҲ оқибатида Россия фуқароси олган тан жароҳатлари билан касалхонага ётқизилган. Кўрсатилган муолажаларга қарамай вафот этган.
Шунингдек, Андижонда 19 апрель куни 20 ёшли талабани уйқу босиши сабабли бешта автомобиль иштирокида ЙТҲ содир бўлган. Оқибатда Damas автомашинасининг 23 ёшли ҳайдовчиси сон синиши туфайли шифохонага ётқизилган.
Ҳозирда ҳар иккала ҳолат юзасидан суриштирув ишлари олиб борилмоқда.
Бундан аввал Жиззахда Nexia билан тўқнашган Lacetti’да қисилиб қолган эркак қутқарилгани, Nexia ҳайдовчиси вафот этиб, уч йўловчи тан жароҳати олгани ҳақида хабар берилганди. Бундан ташқари, Тошкентда дарахтга урилган BMW ағдарилгани, Жиззахда мактаб ўқувчиларини олиб кетаётган автобуслар тўқнашгани хабар қилинган.
Изоҳ (0)