Олий ва ўрта махсус таълим вазири Абдуқодир Тошқулов 22 апрель куни Қарши давлат университетининг талабалари билан очиқ мулоқот ўтказди. Бу ҳақда ЎзА хабар қилди.
Қайд этилишича, учрашувда Абдуқодир Тошқулов тизимда ўз ечимини кутаётган муаммоларга тўхталиб, олий таълим соҳасида олиб борилаётган ислоҳотлар хусусида батафсил сўз юритган. Тадбирда талабаларнинг магистратура мутахассислигига ўқишга кириш учун чет тилини билиш даражаси тўғрисидаги малака сертификати мажбурий қилинганлиги тўғрисидаги саволга олий таълим вазири қуйидагича жавоб берган:
«Шу саволга жавоб бериш асносида сизни янги ўзгаришдан хабардор қилмоқчиман. Жорий йилда магистратурага ўқишга кириш учун мутахассислик фанларидан имтиҳонларни бекор қилиш тартибини кўриб чиқяпмиз. Ўзи шундай ҳам талаба 8 семестр давомида мутахассислик фанларидан керакли кўникма ва билимни эгаллайди.
Магистратура мутахассисликлари бўйича ўқишга кириш учун чет тилини билиш даражаси тўғрисидаги малака сертификати ҳамда бакалавр дипломининг ўртача балли ҳисобга олинади. Ҳозирда ушбу таклиф ўрганиляпти».
Мулоқотда, шунингдек, санъатшунослик таълим йўналишида таҳсил олаётган талабалар учун ҳам алоҳида давлат стипендияларини ташкил қилиш, бакалавриат босқичида хорижий тилларни ўрганиш бўйича ўқув соатларини кўпайтириш, маданият ва санъат муассасаларини ташкил этиш, хорижий тилларни ўргатишга мослашган волонтёрлик марказларини очиш, корейс тилини иккинчи чет тили сифатида ўқув режага киритиш каби бир қатор масалалар юзасидан таклифлар ўртага ташланган.
Вазир билдирилган таклиф ва ташаббуслар ўрганиб чиқилишини маълум қилган.
Изоҳ (0)