Самарқандда ер сотиш билан боғлиқ яна бир жиноий фаолият фош этилди, деб хабар бермоқда вилоят ИИБ матбуот хизмати.
Маълум қилинишича, фуқаро С. ариза билан мурожаат қилиб, унда деҳқончилик ва чорвачилик фаолияти билан шуғулланиши учун Паст Дарғом тумани ҳудудидан ер олиш ниятида апрель ойининг ўрталарида К.З. исмли шахс билан танишиб қолгани, у Паст Дарғом тумани «Найман» маҳалласи ҳудудида жойлашган ўзи раҳбарлик қилиб келаётган фермер хўжалигига тегишли 6 гектар ерни 170 минг доллар эвазига сотишини ҳамда Паст Дарғом туман ҳокимлигидаги танишлари орқали унинг номига расмийлаштириб бериш эвазига олдиндан 20 минг долларни талаб қилаётганини билдириб, унга нисбатан қонуний чора кўришни сўраган.
Мазкур аризага асосан, 23 апрель куни соат 13:10 ларда Самарқанд вилояти ИИБ ЖҚБ Коррупция ва иқтисодий жиноятларга қарши курашиш бўлими Ер ресурслари талон-торож қилинишига қарши курашиш бўлинмаси, ДХХ вилояти бошқармаси ва вилоят прокуратураси ходимлари ҳамкорлигида ўтказилган тезкор тадбир давомида, К.З. ариза муаллифидан 20 минг долларни олган вақтида ашёвий далиллар билан қўлга олинган.
Қайд этилишича, мазкур ҳолат юзасидан терговга қадар текшириш ҳаракатлари олиб борилмоқда.
Бундан аввал Самарқанднинг Каттақўрғон туманида 30 сотих ерни 6 000 долларга сотишга уринган шахс, Самарқанд туманида ҳокимлик захирасидаги 0,4 гектар ерни олиб бериш учун 20 минг доллар олган шахс, шу туманда ҳокимининг сохта қарори билан 19,7 минг долларга ер сотган хўжалик раҳбари ушлангани ҳақида хабар берилган эди.
Изоҳ (0)