Япония Ташқи ишлар вазирлиги «Дипломатиянинг кўк китоби»да 19 йил ичида биринчи марта «шимолий ҳудудлар»ни (Токио Россия таркибидаги Жанубий Курил оролларини шундай атайди) «босиб олинган» деб белгилади.
«Кўк китоб» 1957 йилдан бери ҳар йили нашр этилади, унинг янгиланган версияси 22 апрель куни Вазирлар Маҳкамаси мажлисида тақдим этилди.
Япония ТИВ Россиянинг Украинадаги ҳарбий амалиётини қоралаган ва шу фонда Россия билан тинчлик шартномасини тузиш бўйича музокаралар истиқболлари ҳақида гапириш қийинлигини таъкидлаган. Вазирлик ҳисоботида айтилишича, «шимолий ҳудудлар Япониянинг ажралмас қисми ҳисобланади, аммо улар ҳозирда Россия томонидан ноқонуний равишда босиб олинган».
Токио 2011 йилдан буён оролларни «Японияга тегишли» деб атайди, лекин 2003 йилдан бери «оккупация» сўзини ишлатмаётган эди. Энди Япония ҳукумати ушбу иборани қайта қўллашга қарор қилган, деб хабар берди Kyodo агентлиги.
Иккинчи жаҳон урушидан кейин Россия ва Япония тинчлик шартномасини тузмаган. Шартнома имзоланишига урушдан кейин Совет Иттифоқи назоратига ўтган Курил ороллари — Кунашир, Шикотан, Итуруп ва Хабомаи тизмалари бўйича ҳудудий баҳс тўсқинлик қилмоқда. Токио уларни қайтаришни талаб қилмоқда, Москва бу ҳудудлар қонуний равишда СССР таркибига ўтган деб ҳисоблайди.
21 март куни Россия Ташқи ишлар вазирлиги Москва Токио билан тинчлик шартномаси бўйича музокараларни давом эттириш ниятида эмаслигини эълон қилди, бунга сабаб қилиб «Япония томонидан Россияга қарши қўйилган бир томонлама чекловларнинг дўстона эмаслиги» кўрсатилди (Япония ҳукумати Украинадаги ҳарбий операция муносабати билан Россияга қарши бир неча санкциялар пакетини жорий қилганди). Шунингдек, Москва японларнинг Курил оролларига визасиз ташрифини тўхтатди ва оролларда қўшма иқтисодий фаолиятни йўлга қўйиш бўйича мулоқотдан чиқди.
Токио норозилик билдириб, Россия расмийларининг ҳаракатларини асоссиз ва номақбул деб атади. Япония, шунингдек, Россиянинг уни «дўстона бўлмаган» давлатлар рўйхатига киритиш қарорини қоралади.
Изоҳ (0)