2022 йилда Инфратузилма дастури доирасида ва қўшимча ажратилаётган жами 575 миллиард сўм ҳисобидан 1 823 километр ичимлик суви тармоқлари, 74 та сув иншооти қурилади ва реконструкция қилинади. Бу ҳақда Шавкат Мирзиёев Қарши шаҳрида бўлиб ўтган халқ депутатлари вилоят кенгашининг навбатдан ташқари сессиясида айтиб ўтди, деб хабар бермоқда «Дарё» мухбири.
Натижада, 500 минг нафар аҳоли илк бор сифатли ичимлик сув билан таъминланади, 160 минг нафар аҳолининг сув таъминоти яхшиланади. Марказлашган ичимлик сув таъминоти 43 фоиздан 58 фоизга етказилади.
Масъулларга 110 километр узунликдаги Яккабоғ—Қарши—Косон магистрал ичимлик сув тармоғини қуриш бўйича бир ой муддатда қарор тайёрлаб, 2022—2024 йилларда қурилишини таъминлаш топширилди.
Бундан ташқари, 2022—2024 йилларда умумий қиймати 127 миллион доллар бўлган 2 та лойиҳа доирасида, Косон ва Муборакда 151 минг аҳолининг сув таъминоти, Қарши шаҳрида 250 минг аҳолининг канализация хизмати яхшиланади.
«2022 йилда 1 215 километр электр узатиш тармоқлари, 330 дона трансформатор ва 3 та юқори кучланишли подстанция қурилади. Натижада, 479 та маҳалладаги 270 минг аҳоли ва 5 мингдан зиёд тадбиркорларнинг электр энергия таъминоти яхшиланади», — дейди давлат раҳбари.
Китоб, Шаҳрисабз туманлари ва Шаҳрисабз шаҳрининг газ таъминотини яхшилаш учун 1 сентябрга қадар қўшимча 14 километр газ тармоғи тортиб келинади. Бунда, 9 мингдан зиёд аҳолининг газ таъминоти қайта тикланади ва 240 та корхонанинг газ таъминоти яхшиланади, 300 та корхона газ тармоғига уланади. Мутасаддиларга, шунингдек, 2022 йилда:
- Инфратузилма дастури доирасида ва қўшимча ажратилган 847 миллиард сўм маблағ ҳисобидан 1 570 километр ички йўлларни, 29 та кўприкларни таъмирлаш, 190 километр йўлларни бетон қопламага ўтказиш;
- Кўкдала тумани марказини Қарши шаҳри билан боғловчи 49 километр автомобиль йўлини реконструкция қилиш, ҳамда 2 тасмали йўлдан 4 тасмали йўлга ўтказиш бўйича лойиҳани бошлаш топширилди.
Изоҳ (0)