«Ўзгидромет» яқин уч кун учун об-ҳаво прогнозини эълон қилди.
Унга кўра, 23 апрель, шанба куни Ўзбекистоннинг катта қисмида қуруқ ва илиқ об-ҳаво сақланиб туради. Фақат Қорақалпоғистонда, Хоразм вилоятида ва чўл ҳудудларда баъзи жойларда Волгабўйи ҳудудларидан нам ва нисбатан салқин ҳаво кириб келиши ҳисобига қисқа муддатли ёмғир ёғади.
Якшанба куни нам ҳаво массаси Ўзбекистоннинг барча ҳудудларини қамраб олади. Кўпчилик вилоятларда ёмғир ёғади, момақалдироқ бўлиши мумкин. Тошкент, Самарқанд, Жиззах, Сирдарё вилоятларида ва Фарғона водийси вилоятларида баъзи жойларда ёмғир кучли бўлади. Ҳаво ҳарорати бироз пасаяди ва кундузи 20-25 даражадан юқори бўлмайди.
Республика бўйича баъзи жойларда шамол 17-22 метр/секундгача кучайиши кузатилади.
25 апрель, душанба куни ҳам Ўзбекистоннинг марказий ва шарқий ҳудудларида ёмғир ёғиши сақланиб туради.
24—25 апрелда тоғолди ва тоғли ҳудудларда сел келиши хавфи мавжуд.
Эслатиб ўтамиз, «Ўзгидромет» прогноз қилганидек, 20 апрель куни Самарқанд, Жиззах, Навоий ҳамда Қашқадарё вилоятларида кучли ёмғир ёғиб, сел кузатилди. Сел оқимлари оқизиб кетиши натижасида Фориш туманида 4 киши (1 нафар эркак, 3 нафар аёл) ҳалок бўлди. Кейинчалик яна бир киши ҳалок бўлгани аниқланди.
Изоҳ (0)