Шавкат Мирзиёев иштирокида Қарши шаҳрида халқ депутатлари вилоят кенгашининг навбатдан ташқари сессияси бўлиб ўтмоқда, деб хабар берди «Дарё» мухбири.
Президентнинг айтишича, вилоят улкан саноат салоҳиятига эга бўлса-да, бугунги кунда ялпи ҳудудий маҳсулотда саноат улуши атиги 18 фоизни ташкил этади.
Шуни ҳисобга олиб, 2022—2023 йилларда амалга ошириладиган, умумий қиймати 14,7 триллион сўм бўлган 270 та саноат лойиҳалари дастури шакллантирилган. Бундан ташқари, давлат аҳамиятидаги 7 та йирик лойиҳа амалга оширилмоқда.
Масъулларга Таллимаржон иссиқлик электр станциясида қиймати 829 миллион доллар бўлган, қўшимча 900 мВт қувватларни ишга тушириш лойиҳасини ҳамда Ғузорда қиймати 240 миллион доллар ва қуввати 300 мВт бўлган, қуёш электр станциясини барпо этиш лойиҳасини 2022 йил якунигача бошлаш бўйича топшириқ берилди.
Шунингдек, Кўкдала ва Чироқчи туманларида ҳар бири камида 500 мВт қувватга эга 2 та қуёш фотоэлектр станциясини қуриш бўйича лойиҳаларни амалга оширишни бошлаш зарурлиги таъкидланди.
«Инвестициялар ва ташқи савдо вазирлиги қурилиш материалларини ишлаб чиқариш бўйича умумий қиймати 235 миллион доллар бўлган 70 та лойиҳани 2022 йил якунигача ишга туширишга шахсан жавоб беради. Жумладан, Деҳқонобод ва Қамашида ташкил этилган қурилиш материаллари кластерини 1 декабрга қадар тўлиқ ишга тушириш зарур», — дейди президент.
Бундан ташқари, Китоб туманидаги «Қарши конч цемент» корхонасида 150 миллион доллар хорижий инвестиция ҳисобидан, йилига 1,2 миллион тонна цемент ишлаб чиқариш заводини шу йил июлдан кечиктирмай ишга тушириш кераклиги айтилди. Ушбу янги заводга 15 километрлик темир йўл тортилади.
Изоҳ (0)