Ўзбекистон сўнгги 3 ойда нималар сотиб олди ва сотди?

Мамлакатда сўнгги уч йилдаги каби олтинни саноатни ривожлантиришга сарф этиш давом этмоқда.

Давлат статистика қўмитаси маълумотига кўра, жорий йилнинг январь—март ойлари якуни бўйича ташқи савдо ҳажми 13,2 млрд долларни ташкил этган. Бу ундан олдинги 2021 йилга нисбатан 5,6 млрд долларга кўпроқ. Шундан 5,7 млрд доллари экспортга, 7,3 млрд доллари импортга тўғри келади.

Ўзбекистон ким билан кўпроқ савдо ишларини олиб борган

Сўнгги ойларда Хитой Ўзбекистоннинг савдодаги асосий ҳамкорига айланди. Бу давлат билан товар айирбошлаш ҳажми 2,18 млрд долларга етган.

Россия 1,86 млрд доллар билан иккинчи ўринга тушган бўлса, Қозоғистон 992 млн доллар билан учинчи ўринни эгаллади.

Туркия тўртинчи ўринни (776 млн доллар), Жанубий Корея эса бешинчи ўринни ( 630 млн доллар) эгаллаган.

Шунингдек, Германия, Қирғизистон, Туркманистон, Афғонистон ва Ҳиндистон ҳам кучли ўнликдан жой олган.

Ўзбекистон бу мамлакатларнинг деярли барчаси билан савдо муносабатларида сотишдан кўра, кўпроқ сотиб олади. Айниқса, Жанубий Корея билан орадаги фарқ кучли — экспорт атиги 11,2 млн долларни, импорт эса 619,6 млн долларни ташкил этган.

Ўзбекистон кимга нима сотди

Биринчи ўринда олтин (улуши 51,5 фоиз). Иккинчи ўринда  саноат товарлари (19 фоиз), учинчи ўринда хизматлар (9,8 фоиз).

Миқдорлар ҳақида гапирадиган бўлсак, олтин 2,9 млрд долларга, саноат товарлари 1,09 млрд долларга, хизматлар эса 567 млн долларга сотилган.

Ўғитлар ва энергия ишлаб чиқарувчи машиналар экспорти бир неча баравар ошди, аммо сабзавот ва мевалар, ёғлар, электр токи, чўян, пўлат ва олтин савдоси камайди.

9,1 фоиз улуш билан Хитой асосий харидор бўлган. Иккинчи ўринда Россия (8,4 фоиз), учинчи ўринда Туркия (6,6 фоиз).

Тошкент шаҳри, Тошкент ва Андижон вилоятлари хорижга энг кўп маҳсулот сотган. Энг кам сотганлар — Сурхондарё,  Хоразм ва Жиззах вилоятлари.

Ўзбекистон кимдан нима сотиб олди

Биринчи ўринда аввалги йиллардаги каби саноатни ривожлантириш учун машина ва ускуналар (1,5 млрд доллар).

Иккинчи ўринда саноат маҳсулотлари (900 млн доллар), учинчи ўринда кимёвий воситалар ва шунга ўхшаш маҳсулотлар (715 млн доллар).

Ичимликлар, газ ва ҳайвонлар импорти бир неча баробар ошган. Хориждан олтин, арматура, автомобиллар учун эҳтиёт қисмлар харид қилиш камайган.

Ўзбекистон энг кўпи Хитой (22,5 фоиз), Россия (18,7 фоиз) ва Қозоғистондан (10,3 фоиз) харид қилган.

Ҳудудлар бўйича энг кўп импорт қилинган маҳсулотлар Тошкент шаҳри, Тошкент ва Андижон вилоятларига тўғри келади. Энг ками — Хоразм вилояти, Қорақалпоғистон Республикаси ҳамда Сурхондарё вилоятига.

Эътиборга молик жиҳатлар

Ўзбекистон сотишдан кўра, кўпроқ сотиб олишда давом этмоқда. Бу иқтисодиётни жадал ривожлантириш учун ресурслар ва воситалар сотиб олинаётгани билан изоҳланади.

Шу мақсадда мамлакат бир неча йиллардан бери саноат учун зарур бўлган машина ва ускуналарга энг кўп маблағ сарфлади. Бунинг эвазига, масалан, олтин юборилмоқда.

2022 йилнинг январь—март ойларида Ўзбекистон Республикаси ташқи савдо айланмасининг 30 фоизи МДҲ давлатларига тўғри келиб, 2021 йилнинг мос даврига нисбатан улуши 10,2 фоизга камайган.