«Ҳеч қандай дефолт бизга таҳдид солмаяпти» — Россия банки раиси Элвира Набиуллина

Россия банки раиси Элвира Набиуллина мамлакатда барча зарур молиявий ресурслар мавжудлиги, давлат дефолт хавфи остида эмаслигини билдирди. Бу ҳақда «Ведемости» хабар берди.

«Россияда барча зарур молиявий ресурслар мавжуд. Ҳеч қандай дефолт бизга таҳдид солмаяпти», — деди у.

6 апрель куни Россия Молия вазирлиги 649,2 миллион долларлик еврооблигациялар бўйича ўз мажбуриятларини бажарганини маълум қилди. Вазирлик биринчи марта тўловларни рублда амалга оширди.

Хорижий вакиллик банки чет эл валютасида тўловни амалга оширишдан бош тортди. Шунинг учун вазирлик Россия банкларида махсус яратилган инвесторларнинг рубль ҳисоб рақамларига маблағ ўтказишга мажбур бўлди.

Fitch халқаро рейтинг агентлиги Россиянинг доллар облигациялари бўйича фоизларни рублда тўлаши 30 кундан кейин дефолтга сабаб бўлишидан огоҳлантирган эди.

Молия вазири Антон Силуанов март ойи ўрталарида Россия Марказий банки ва ҳукумати активларини музлатишга қарор қилган хорижий давлатлар Россияда сунъий дефолт яратиш ниятида эканини айтди.

Мамлакатда мажбуриятларни бажариш учун зарурий миқдорда маблағ бор, – деди у.

Молия вазирлиги материалларидан келиб чиққан ҳолда, жорий йилда Россия 2,66 миллиард доллар қарзни, жумладан, 2,53 миллиард доллар хорижий валютадаги давлат қимматли қоғозларини, 132 миллион доллар қийматдаги хорижий ҳукуматлар, халқаро молия ташкилотлари ва хорижий юридик шахсларнинг кредитларини тўлаши керак.

17 март куни Молия вазирлиги ташқи қарз бўйича 117,2 миллион долларлик облигациялар бўйича купонлар тўлаганини маълум қилди. Тўлов вазирлик топшириғи билан хорижий валютада амалга оширилган. Бу захираларнинг бир қисми музлатилганидан кейин Россиянинг ташқи қарзи бўйича биринчи тўлов эди.

Аввалроқ Россия 4 майгача инвесторларга доллар тўламаса, дефолт бўлиши мумкинлиги ҳақида хабар берилган эди.