Шавкат Мирзиёев раислигида 19 апрель куни ўтказилган йиғилишда ҳунармандчилик, тикувчилик, косибчилик, қандолатчилик каби уй шароитидаги кичик ишлаб чиқариш лойиҳаларини маҳалланинг ўзида кенгайтириш кераклиги таъкидланди. Бу ҳақда президент матбуот котиби хабар қилди.
Қайд этилишича, шу муносабат билан бир ой муддатда саноат, ҳунармандчилик ва касаначилик микро марказларини 700 та ихтисослашган маҳаллада ташкил этиш ишларини бошлаш бўйича топшириқ берилган. Бу марказларнинг 70 таси ишсизлик даражаси юқори бўлган маҳаллаларда очилиши зарур. Ушбу марказлардан 5 йил муддатда ер ва мол-мулк солиғи ундирилмайди.
Жорий йилда бу мақсадларга 500 миллиард сўм йўналтирилади, ушбу саноат марказлари орқали 50 минг нафар аҳоли бандлиги таъминланади.
Шунингдек, йил бошидан буён ҳоким ёрдамчилари томонидан 5 мингга яқин бўш бинолар аниқланган. Ҳоким ёрдамчилари аниқлаган бўш бино-иншоотларни сотиш, ижарага беришдан тушган маблағлар ушбу маҳалланинг инфратузилмасини ривожлантиришга сарфланиши белгиланган.
«Умуман, йил якунига қадар бўш бино қолиши керак эмас», — деган президент.
Мавзуга доир:
- Шавкат Мирзиёев ҳокимларга 3,5 мингдан ортиқ маҳаллага бориб, муаммоларни ҳал қилиш вазифасини қўйди
- «Ҳоким ёрдамчилари кредит, субсидия, ер олиб бераман, деб тамагирлик қилаётгани жуда ачинарли ҳолат» — Шавкат Мирзиёев
- Ўзбекистонда ижобий натижага эришган қарийб 3 минг нафар ҳоким ёрдамчисига ташаккурнома берилади
Изоҳ (0)