Сурхондароё вилоятининг Термиз шаҳрида ЙПХ инспекторини уриб, унга тан жароҳати етказган ҳайдовчига жиноят иши қўзғатилди. Бу ҳақда вилоят прокуратураси хабар берди.
Маълум бўлишича, 2022 йил 11 апрель куни тахминан соат 17:30 да вилоят ИИБ, ЙҲХБ ходими катта сержант А.Камолов тасдиқланган жойлашув тақсимотига асосан Термиз шаҳар ҳудудида ўз хизмат вазифасини бажараётган бўлган. ЙПХ ходими Термиз шаҳар «Бўстон» маҳалласи Ибн-Сино кўчасидан Темир йўл бекати томонга ҳаракатланиб кетаётган Nexia-3 ҳайдовчисини тўхтатиб, ҳаракат давомида хавфсизлик камаридан фойдаланмай келаётгани учун тўхтатилганини айтиб, ҳужжатларини сўраган. Ҳайдовчи А.Ж. ходимга ҳужжатларини тақдим этмасдан турли хил важлар келтириб, ИИБ ходимининг қонуний талабини бажармаган.
Шунда ЙПХ инспектори автомашинани жарима майдончасига олиб кетишга уринган. Бироқ, ҳайдовчи жавобгарликдан қутилиш мақсадида ЙПХ инспекторига фаол қаршилик кўрсатиб, унинг хизмат вазифасини бажаришига тўсқинлик қилган. Ҳайдовчи ҳаракатлари давомида ЙПХ катта инспекторининг бош, пешона ва юз соҳасига уриб енгил тан жароҳати етказган.
Мазкур ҳолат юзасидан Термиз шаҳар прокуратураси томонидан терговга қадар текширув ҳаракатлари олиб борилиб, 2022 йилнинг 12 апрель куни ҳайдовчини Жиноят кодексининг 219-моддаси 2-қисми (ҳокимият вакилига қаршилик кўрсатиб, ўзининг хизмат вазифасини бажаришдан воз кечишга, шунингдек қонунга хилоф ҳаракатлар содир этишга мажбур қилишга уриниш) билан айблаб, қамоққа олган.
Изоҳ (0)