2021 йилда Адлия вазирлиги томонидан коррупцияга қарши экспертизадан ўтказилган лойиҳаларнинг 245 тасида 405 та коррупциявий омиллар аниқланган. Бу ҳақда АОКАда Адлия вазирлиги ва Коррупцияга қарши курашиш агентлиги масъул ходимлари иштирокида ўтган матбуот анжуманида маълум қилинди.
Қайд этилишича, 2021 йил якунига қадар Адлия вазирлиги томонидан 1 820 та норматив-ҳуқуқий ҳужжатлар лойиҳалари коррупцияга қарши экспертизадан ўтказилган. Ушбу даврда киритилган лойиҳаларнинг 708 таси ёки 39 фоизида чеклист тўлдирилмаган. Бу ушбу лойиҳаларнинг коррупцияга қарши экспертизадан ўтказилмаганлигидан далолат беради.
Маълум бўлишича, ўтган давр мобайнида Адлия вазирлиги томонидан коррупцияга қарши экспертизадан ўтказилган лойиҳаларнинг 245 тасида 405 та коррупциявий омиллар аниқланган. Шундан 114 та лойиҳа алоҳида тартибда коррупцияга қарши экспертизадан ўтказилганда уларнинг 83 тасида 237 та коррупциявий омиллар аниқланган.
Шунингдек, 2022 йил I чораги давомида киритилган 584 та лойиҳаларнинг 163 тасига ёки 28 фоизига коррупциявий омилларни аниқлаш бўйича чеклист илова қилинмаган. Бу эса ушбу лойиҳаларнинг ишлаб чиқувчилари томонидан коррупцияга қарши экспертизадан ўтказилмаганлигини билдиради.
Ушбу даврда Адлия вазирлиги томонидан коррупцияга қарши экспертизадан ўтказилган лойиҳаларнинг 74 тасида 122 та коррупциявий омиллар аниқланган. Шу билан бирга, 34 та лойиҳага чеклист илова қилинмаганлиги сабабли лойиҳалар экспертизадан ўтказилмай қайтарилган.
2021 йил давомида Адлия вазирлиги томонидан манфаатдор вазирлик ва идоралар билан биргаликда жами 892 та амалдаги норматив-ҳуқуқий ҳужжатлар коррупцияга қарши экспертизадан ўтказилиб, уларнинг 224 тасида 660 дан ортиқ коррупциявий омиллар аниқланган.
Изоҳ (0)