O‘zbekistonda YPX xodimi tasvirini uning ruxsatisiz tarqatish taqiqlanishi mumkin

Ichki ishlar vazirligi “Yo‘l-patrul xizmati xodimlarining yo‘l harakati qatnashchilari bilan o‘zaro munosabatlari hamda maxsus moslamalardan foydalanishi tartibi to‘g‘risidagi nizomga qo‘shimcha kiritish to‘g‘risida”gi Vazirlar Mahkamasi qarori loyihasini muhokamaga qo‘ydi.

Qaror loyihasida Yo‘l-patrul xizmati xodimlarining yo‘l harakati qatnashchilari bilan o‘zaro munosabatlari hamda maxsus moslamalardan foydalanishi tartibi to‘g‘risidagi nizomga qo‘shimcha kiritish taklif etilgan.

Unga ko‘ra, Vazirlar Mahkamasining 2018-yil 1-dekabrdagi 975-son qarori bilan tasdiqlangan Yo‘l-patrul xizmati xodimlarining yo‘l harakati qatnashchilari bilan o‘zaro munosabatlari hamda maxsus moslamalardan foydalanishi tartibi to‘g‘risidagi nizomning 19-bandining oltinchi xatboshisi quyidagicha to‘ldiriladi: “YPX xodimining o‘z xizmat vazifalarini bajarishi bilan bog‘liq holatda olingan foto va video tasvirlarini uning ruxsatisiz internet jahon axborot tarmog‘ida joylashtirmaslik”.

Qaror loyihasi muhokamasi 29-mart kunigacha davom etadi.

Avvalroq Toshkent viloyatida YPX xodimi xizmat vaqtida uxlab yotgani aks etgan videolavha tarqalgan edi. Yo‘l harakati xavfsizligi xizmatining ma’lum qilishicha, transport vositalarining tezligini qayd qiluvchi maxsus avtomatlashtirilgan radar moslamasi bilan jihozlangan Nexia-3 xizmat avtomobilida YPX xodimi B.A. uxlab yotgani noma’lum fuqaro tomonidan videotasvirga olingan va ijtimoiy tarmoqda tarqatilgan.